ԵՐԵՎԱՆ, 30 հուլիսի — Sputnik. 2 օր հետո չափազանց շոգ եղանակը կնահանջի։ Օդի ջերմաստիճանը Հայաստանի ամբողջ տարածքում կնվազի 40 աստիճանից։
Այս մասին իր ֆեյսբուքյան էջում հայտնում է ՀՀ ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը։
«Օգոստոսի 1-2-ին ցուրտ օդային հոսանքների ազդեցությունը կզգացվի հատկապես հյուսիսային մարզերի վրա, իսկ օգոստոսի 3-4-ին սառը օդը կներխուժի հանրապետության ողջ տարածք, և օդի ջերմաստիճանը բոլոր մարզերում կնվազի 7-8 աստիճանով»,– գրում է Սուրենյանը։
Իսկ մինչ այդ, մինչև օգոստոսի 1-ը Հայաստանի ողջ տարածքում շոգ եղանակը կպահպանվի։ Հուլիսի 30-ից օգոստոսի 1-ը ցերեկային ժամերին Երևանում և որոշ մարզերում օդի ջերմաստիճանը կհասնի 40-42 աստիճանի, գիշերը՝ 26-27։
Մինչ այդ, Գագիկ Սուրենյանը Sputnik Արմենիային հայտնել էր, որ օգոստոսյան եղանակը շատ նման է լինելու հուլիսյանին։ Հիմնականում կգերիշխի բարձր ջերմային ֆոնը, որը ժամանակ առ ժամանակ կընդհատվի սևծովյան սառը օդային ցիկլոններով, ինչով պայմանավորված ջերմաստիճանը որոշ օրեր զգալի կնվազի։
