ԵՐԵՎԱՆ, 30 հուլիսի — Sputnik. Ռուսաստանն ամեն կերպ ողջունում է Հայաստանի և Ադրբեջանի միջև շփումները` նպաստելով երկու երկրների միջև փոխհարգալից երկխոսության զարգացմանը։ Այս մասին Sputnik Ադրբեջանին տված հարցազրույցում հայտնել է Ռուսաստանի ԱԳՆ պաշտոնական ներկայացուցիչն։
Նրա համոզմամբ՝ Մոսկվայի դիրքորոշումը միշտ բխել է այն կետից, որ երկխոսության, երկու մայրաքաղաքների միջև շփումների և դրական արդյունքների հասնելու միջոցով է հնարավոր առաջընթացն ու առկա խնդիրների լուծումը։
«Պատմականորեն Ռուսաստանն իրեն դրսևորում էր պատասխանատու միջնորդ, որը բազմիցս գործնականում ապացուցել է իր կառուցողական դերը։ Այդպես է լինելու նաև այսուհետ», – ավելացրել է նա` ի պատասխան ՀՀ վարչապետի վերջերս արված հայտարարությունը մեկնաբանելու խնդրանքին։ Նիկոլ Փաշինյանն իր հարցազրույցներից մեկում ասել էր, որ Ռուսաստանը բոլոր լծակներն ու հնարավորություններն ունի, որպեսզի պատերազմ թույլ չտա Արցախում։
Մոսկվան հստակ շարադրում է պաշտոնական դիրքորոշումը կապված Արցախյան հակամարտության կարգավորման հետ։ Այդ դիրքորոշումը հետևողական է, կարծում է Զախարովան։
ՌԴ արտաքին գերատեսչության ներկայացուցիչը նաև անդրադարձել է ռուս փորձագետների և պատգամավորների վերջերս Ադրբեջան կատարած այցին։ Նրանք այցելել էին հակամարտ կողմերի շփման գծում գտնվող ադրբեջանական դիրքերը և մի շարք հայտարարություններ արել ի աջակցություն «Ադրբեջանի տարածքային ամբողջականության»։
Զախարովայի կարծիքով` ժողովրդավարական հասարակություն ունեցող ցանկացած երկրում բազմաթիվ փորձագետներ և քաղաքական գործիչներ կան, որոնք սեփական կարծիքն են արտահայտում։ Դա պետական տեսակետ չէ, սակայն նրանք դրա իրավունքն ունեն։
«Սակայն ամեն անգամ, երբ Մոսկվայի պաշտոնական դիրքորոշման վերաբերյալ հարցեր են առաջանում, կարող եք համոզված լինել, որ Արցախյան հակամարտության կարգավորման վերաբերյալ հարցում մեր դիրքորոշումը հստակ է, այն երբեք երկիմաստ չի եղել։ Բոլոր ջանքերը կենտրոնացած էին միջնորդի դերին, որի վերջնական նպատակը փոխընդունելի պայմանավորվածությունների ձեռքբերումն է», – ավելացրեց Զախարովան։
Այսօրվա դրությամբ համաշխարհային կայունության համար ամենակարևոր հարցերից մեկը` միջազգային գործերում խոշոր պետությունների և խոշոր խաղացողների դիրքորոշումներում հետևողական լինելն է։ Եվ Ռուսաստանը հենց այդպիսի երկիր է, ավելացրել է նա։
Նրա խոսքով` և՛ Բաքվում, և՛ Երևանում գիտեն, որ Մոսկվան հուսալի գործընկեր է այդ առումով։ Կողմերը վստահում են Մոսկվային և նրա դերին։
