ԵՐԵՎԱՆ, 30 հուլիսի– Sputnik. Այսօր Սոչիում սննդի կետի հարակից կառույցում բռնկված հրդեհի հետևանքով մահացածների մեծ մասը, նախնական տվյալների համաձայն, ՀՀ քաղաքացիներ կամ հայեր են, տեղեկացնում են ռուսական ԶԼՄ–ները։
«Նախնական տվյալների համաձայն` Ադլերում սննդի կետի հարակից կառույցում բռնկված հրդեհից մահացած վարձու աշխատակիցների մեջ Հայաստանի քաղաքացիներ կան»,– «ԻտարՏասսին» ասել է թղթակիցը։
ՀՀ ԱԻՆ մամուլի ծառայության տվյալներով էլ` հուլիսի 30-ին, ժամը 11:47-ին ՌԴ ԱՃԿԿ միջազգային համագործակցության գլխավոր մասնագետից տեղեկատվություն է ստացվել ՀՀ ԱԻՆ Փրկարար ծառայության Ճգնաժամային կառավարման ազգային կենտրոն, որ հուլիսի 30-ին ժամը 05:40-ին (Մոսկվայի ժամանակով) Սոչի քաղաքի Ադլերի շրջանի Պրոսվեշչենիա փողոցի թիվ 81 տանը (2 հարկանի, 300 քմ) բռնկված հրդեհի հետևանքով զոհվել են 8, տուժել՝ 11 քաղաքացի: Նախնական տվյալներով զոհերի մեջ կա ՀՀ քաղաքացի:
Ժամը 12:04-ին կապ է հաստատվել Կրասնոդարի երկրամասի ՃԿԿ ՕՀ-ի հետ. վերջինս հաղորդել է, որ զոհվածներից մեկը՝ ՀՀ քաղաքացի Նիրվարդ Ստեփանի Հարությունյանն է (ծնված 1950 թ.):
Ավելի վաղ տեղեկացրել էինք, որ Սոչիում բռնկված հրդեհի հետևանքով ութ մարդ է մահացել։ Զոհվածների թվում նաև երեխա կա։ Եվս 11 մարդ վնասվածքներ են ստացել։ Դեպքի առթիվ քրեական գործ է հարուցել։
