ԵՐԵՎԱՆ, 2 օգոստոսի — Sputnik. «Բարգավաճ Հայաստան» կուսակցության Երևանի քաղաքապետի թեկնածուն Նաիրա Զոհրաբյանն է։ Այս մասին իր ֆեյսբուքյան էջում հայտնել է ԲՀԿ մամուլի խոսնակ Վանիկ Էլիզբարյանը։
Նրա գրառման համաձայն` Երևանի ավագանու ԲՀԿ նախընտրական ցուցակը կգլխավորի ԱԺ «Ծառուկյան» խմբակցության պատգամավոր, ԲՀԿ քաղաքական խորհրդի քարտուղար Նաիրա Զոհրաբյանը։
«ԱԺ «Ծառուկյան» խմբակցության պատգամավոր, ԲՀԿ քաղաքական խորհրդի քարտուղար Նաիրա Զոհրաբյանը կգլխավորի ԲՀԿ Երևանի ավագանու նախընտրական ցուցակը, եռյակում կլինեն Պետրոս Ղազարյանը և Արման Աբովյանը»,- գրել է նա։
Հիշեցնենք` 2011թ.–ից Երևանի քաղաքապետի պաշտոնը զբաղեցնող Հայաստանի Հանրապետական կուսակցության անդամ Տարոն Մարգարյանը այս տարվա հուլիսի 9–ին հրաժարական տվեց։
Քաղաքապետի ընտրության նպատակով հրավիրված ավագանու արտահերթ նիստը հուլիսի 16-ին չկայացավ` քվորումի բացակայության պատճառով, քանի որ ՀՀԿ–ն և «Ելքը» նախապես հայտարարել էին, որ չեն մասնակցելու նիստին և պատրաստվում են արտահերթ ընտրությունների։ Քաղաքացիական պայմանագիրն արդեն հայտարարել է` քաղաքապետի իր թեկնածուն Հայկ Մարությանն է։
Ավագանու արտահերթ ընտրությունն անցկացվում են ավագանին ցրելու մասին կառավարության որոշումից 30-40 օր հետո։
