ԵՐԵՎԱՆ, 3 օգոստոսի — Sputnik. Սոչիի Ադլերի շրջանում մասնավոր տան մեջ բռնկված հրդեհի հետևանքով մահացել են ոչ թե 8, ինչպես նախկինում էր ասվում էր, այլ 10 մարդ։ Եվս երկու մահացածների մարմինները հայտնաբերել են փլատակները հավաքելու ընթացքում։ Այս մասին հայտնում է ՌԻԱ Նովոստին` հղում անելով Ռուսաստանի Քննչական կոմիտեին։
«Քննության տվյալների համաձայն` հրդեհման օջախը խորովածանոցն է, որտեղից կրակը հարևան շենքին է փոխանցվել, որի սեփականատերը վարձակալության էր հանձնում այն հանգստացողներին։ Քննիչները պարզել են նաև, որ տարածքում մեկ հարկանի շինություն է եղել, որը նույնպես սեփականատերը վարձակալության էր հանձնում», – նշվում է ՌԴ ՔԿ հայտարարության մեջ։
Նշվում է, որ ի սկզբանե համարվում էր, որ 8 մարդ է մահացել, սակայն դեպքի վայրում լրացուցիչ զննման ընթացքում քննիչները ևս երկու դի են հայտնաբերել։ Այսպիսով, մահացածների թիվը հասել է տասի։ Քննիչներն ապօրինի շինության սեփականատիրոջը մեղադրանք են ներկայացրել` ոչ պատշաճ ծառայություններ մատուցելու համար։
Տղամարդը լիովին ընդունում է իր մեղքն ու համագործակցում է քննության հետ։ Հրդեհման պատճառը հայտնի կդառնա միայն փորձաքննության արդյունքում։ Հայտնաբերված բոլոր մարմինները գենետիկ փորձաքննություն են անցնում։
Ավելի վաղ հայտնում էին, որ դեպքի հիման վրա քրեական գործ է հարուցվել։ Սոչիի քաղաքապետարանի տվյալների համաձայն` բոլոր մահացածերը Ռուսաստանից ու ԱՊՀ երկրներից եկել էին Սոչի` աշխատելու։
Հիշեցնենք, հուլիսի 30-ի գիշերը Սոչի քաղաքի Ադլերի շրջանի Պրոսվեշչենիա փողոցի թիվ 81 տանը բռնկված հրդեհի հետևանքով զոհվել է 8, տուժել՝ 11 քաղաքացի:Զոհվածներից 4–ն ազգությամբ հայ էին, 3–ը` նույն ընտանիքից։ Նրանցից 1–ը նաև ՀՀ քաղաքացի էր։
