ԵՐԵՎԱՆ, 5 օգոստոսի — Sputnik. Այսօր` օգոստոսի 5-ին, ավազակային հարձակում է տեղի է ունեցել Գեղարքունիքի Ծովակ գյուղի բենզալցակայանի վրա։
Ինչպես տեղեկացնում է Shamshyan.com-ը, ժամը 00։10-ի սահմաններում Ծովակ գյուղի բնակիչ 57-ամյա Սահարունի Խաչատրյանը Ոստիկանության Վարդենիսի բաժին ահազանգել է, որ Ծովակի խաչմերուկում գործող բենզալցակայան են եկել «ՋԻՊ» մակնիշի առանց համարանիշի ավտոմեքենայով 2 մարդ։ Նրանք մտել են բենզալցակայանի տարածք, իրեն հարցրել են, թե արդյոք բենզին ունի՞։
Որից հետո այդ երկուսը` դեմքերը բժշկական սպիտակ դիմակներով փակած, ավտոմեքենայի միջից իր վրա են պահել ատրճանակ ու պահանջել, որ բենզալցակայանում եղած ողջ գումարը հանի։ Նրանք այդ ամենը ասելուց հետո ատրճանակը բերել են մարտական վիճակի։
Երբ Ս․ Խաչատրյանը, ըստ իր հայտնածի, մտել է բենզալցակայան ու վերցրել սեղանին դրված բջջային հեռախոսը, նրանք դիմել են փախուստի, գնալով դեպի Կարճաղբյուր գյուղի ուղղությամբ։
Փաստի առթիվ՝ ավազակային հարձակում և ապօրինի զենք-զինամթերք կրելու, պահելու հատկանիշներով Հայաստանի քննչական կոմիտեի Գեղարքունիքի մարզային քննչական վարչության Վարդենիսի քննչական բաժնում նյութեր են նախապատրաստվում։
