ԵՐԵՎԱՆ, 5 օգոստոսի –Sputnik, Աշոտ Սաֆարյան. Իրան–Հայաստան երկաթգծի շինարարությունը բավական իրատեսական է, Sputnik Արմենիայի հետ զրույցում ասաց «Ռուսական երկաթուղիներ» ԲԲԸ–ի տնօրենի առաջին տեղակալ Ալեքսանդր Միշարինը։
Հարավկովկասյան երկաթուղի ՓԲԸ-ն «Ռուսական երկաթուղիներ» ԲԲԸ-ի դուստր ընկերությունն է, որը կոնցեսիոն համաձայնագրի համապատասխան կառավարում է Հայաստանի երկաթուղային ցանցը և Իրանի հետ նախագծի իրականացման դեպքում շահառուներից մեկը կլիներ։
«Մենք իսկապես սկսեցին քննարկել այդ հարցը։ Ավելին, այսօր այդ երթուղին (Պարսից ծոց–Սև ծով, անցնում է Հայաստանով, խմբ.) մուլտիմոդալ է, այսինքն՝ բաղկացած է երկաթուղային և ավտոմոբիլային փոխադրումներից։ Կարծում ենք, որ այն ջանքերը, որոնք գործադրել են Հայաստանի և Իրանի կառավարությունները այդ երթուղին ձևավորելու համար, պետք է զարգացնել և շարունակել», – նշեց Միշարինը։
Երկրորդ փուլում կարելի էր երկաթգծի երթուղու համար ներդրումների հիմնավորում նախապատրաստել։
«Կարծում եմ, որ Իրանից դեպի Հայաստան երկաթուղու կառուցումը բավական հավանական է։ Պարզապես դրա համար աշխատել է պետք, ներդրումներ գտնել և այլն», – ասաց նա։
Հայաստանում կարծում են, որ ճանապարհի շինարարությունը էապես կարող էր չեզոքացնել Անկարայի և Բաքվի` տարածաշրջանային նախագծերից Երևանին դուրս մղելու փորձերը։ Թուրքիան, Ադրբեջանն ու Վրաստանը հոկտեմբերին գործարկեցին Բաքու–Թբիլիսի–Կարս երկաթգիծը։ Երևանում այս իրադարձությունը մտահոգության տեղիք տվեց։
Մեր զրուցակիցը, կարծում է, որ այս կամ այն տրանսպորտային նախագիծը ինքնուրույն չի կարող մրցել մյուսների հետ` ամեն ինչ պայմանավորվում է ինքնարժեքով և տեղափոխման պայմաններով։ Այդ առումով` Հայաստանի տարածքով «Պարսից ծոց–Սև ծով» միջանցքով բազմամոդելային փոխադրումները կարող էին որոշակի պայմանների առկայության դեպքում բավական արդյունավետ աշխատել։
ՀՀ կառավարությունը 2014 թ.-ի օգոստոսի 7-ին հավանություն է տվել Իրան-Հայաստան երկաթուղու շինարարության նախնական ծրագրին։ Նախագծի արժեքը գնահատվում է 3,5 մլրդ դոլար։ Երկաթուղու երկարությունը կկազմի 300 կիլոմետր։
Երկաթուղու ենթակառուցվածքում կներառվեն 19,4 կիլոմետր երկարությամբ 64 կամուրջ, 102,3 կիլոմետր երկարության 60 թունել և 27 կայան։
Երկաթուղու նախագիծը մշակել է Չինաստանի շինարարության և հաղորդակցությունների միջազգային ընկերությունը (CCCC International)։ Նախագծով հետաքրքրվում են չինական բանկերը, որոնք պատրաստակամություն են հայտնել ֆինանսավորել ծրագրի 60 տոկոսը։
Սակայն իրական ներդրողների բացակայության պատճառով կառուցումը մինչև հիմա հարցականի տակ է։
