ԵՐԵՎԱՆ, 8 օգոստոսի — Sputnik. Ազգային ժողովի պատգամավոր, գեներալ ի փաստաբանն ահազանգում է. նրա պաշտպանյալի վիճակն օրեցօր վատանում է։
Sputnik Արմենիայի թղթակցի հետ զրույցում նա ասաց, որ արյան մեջ շաքարի պարունակությունն է բարձր, քիմիաթերապիայի կուրսն ուշացնում են, ու այդ ամենը կարող է Գրիգորյանի առողջության վրա անդառնալի հետևանքներ թողնել։
Ներկայումս կալանքի տակ գնվող Գրիգորյանը օնկոլոգիական հիվանդություն ու շաքարախտ ունի։ Նա տարեկան առնվազն մեկ անգամ արտասահմանում քիմիոթերապիայի կուրս է անցնում։ Այս տարվա հուլիսին Գրիգորյանը պետք է հերթական կուրսն անցներ, սակայն նրան ձերբակալել ու հետո կալանավորել են։
Փաստաբան Մկրտչյանի խոսքով`Գրիգորյանին կալանքի տակ պահելն աննպատակահարմար է, պետք է շտապ փոխել խափանման միջոցը։
«Ես նրա հետ օրական 2–3 ժամ եմ անցկացնում։ Նրա վիճակն օրեցօր վատանում է, նա հուլիսին պետք է քիմիաթերապիա անցներ։ Նա չստացավ ու դրա հետևանքով հիվանդությունը հիմա զարգանում է», – նշեց նա։
Մկրտչյանն ասաց, որ նախկինում նրա պաշտպանյալի արյան մեջ շաքարի մակարդակը 10 մմոլ էր, հիմա հասել է 20–ի։ Փաստաբանը կարծում է, որ քննչական մեկուսարանի պայմանները թույլ չեն տալիս ժամանակին Գրիգորյանին բուժօգնություն ցուցաբերել։
«Դուք երբևիցե լսե՞լ եք, որ մեկուսարանում քիմիաթերապիա անցնեն։ Հիվանդանոցային պայմաններ են պետք», – ասաց Մկրտչյանը։
Միակ բանը, որը Գրիգորյանը ստանում է, դեղերն են։ Փաստաբանը նշում է, որ առանց դրանց նա պարզապես կմեռներ։ Սակայն այդ դեղերը բավարար չեն։
Ի՞նչ է մտադիր ձեռնարկել պաշտպանությունը ու արդյո՞ք խափանման միջոցի փոփոխման մասին միջնորդագիր է ներկայացվել։ Փաստաբանը չի շտապում բացել խաղաքարտերը։ Նա խոստանում է, որ «պետք եղած ժամանակ» բոլոր անհրաժեշտ տեղեկությունը կտա։
Մանվել Գրիգորյանը կալանավորվել է հունիսի 19-ին` 2 ամիս ժամկետով։ Հիշեցնենք` ԱԱԾ-ն հունիսի 17-ին տեսանյութ էր հրապարակել` ներկայացնելով ՀՀ Արմավիրի մարզի Արշալույս գյուղի Լճափնյա փողոցում գտնվող, Մանվել Գրիգորյանին սեփականության իրավունքով պատկանող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
