ԵՐԵՎԱՆ, 3 սեպտեմբերի — Sputnik. Լիխտենշտեյնի հավաքականի հետ մեր ընտրանին պաշտոնական խաղերում մրցելու է առաջին անգամ:
Մասնագետները հիմնականում այս մրցակցությունում հավատում են մեր ընտրանու հաղթանակին, բայց Հայաստանի հավաքականին «Հանրապետականում» «զբոսանք» չի սպասվում:
Այսպես է կարծում Արազ Օզբիլիսը, որը տևական ընդմիջումից հետո նորից հրավիրվել է հավաքական:
«Շատ լավ է, որ ես նորից հավաքականում եմ, ինչի համար ուրախ եմ: Կարևոր է, որ աստիճանաբար խաղային պրակտիկա եմ ձեռքբերում և խաղից խաղ բարելավում մարզավիճակս Հոլանդիայում: Իսկ հավաքականի առաջիկա խաղում չեմ կարծում, որ հեշտ է լինելու, չնայած հավատում եմ, որ հաղթելու ենք: Հիմա թույլ թիմեր համարյա չկան, կամ չկան: Այնպես, որ հաղթելու համար պետք է խաղին անմնացորդ նվիրվենք»- ասել է Օզբիլիսը:
Էականորեն խաղընկերոջ կարծիքից չէր տարբերվում մեր ընտրանու փորձառու ևս մեկ ֆուտբոլիստի՝ Գևորգ Ղազարյանի կարծիքը.
«Ազգերի լիգան շատ լավ հնարավորություն է Եվրոպայի առաջնության ուղեգիր վաստակելու համար: Բայց միայն մենք չէ, որ այդպես ենք մտածում: Բոլոր հավաքականների համար էլ այդ շանսը կա: Այնպես որ` չեմ կարծում, թե հեշտ խաղեր են լինելու: Կարծում եմ, որ մենք ուժեղ ենք Լիխտենշտեյնից, բայց դա պետք է ապացուցենք խաղադաշտում և միայն այդ դեպքում կհաղթենք: Թերագնահատել մրցակցին երբեք պետք չէ, խնդիրներ չունենալու համար պետք է դուրս գալ խաղադաշտ ու բոլոր ուժերը թողնել խաղադաշտում»:
Հայաստանի հավաքականի կազմում Լիխտենշտեյնի հետ խաղում իր առաջին պաշտոնական խաղը կարող է անցկացնել շվեդական «Գյոթեբորգում» հանդես եկող Անդրե Չալշըրը: Ի դեպ, Անդրեի հետ զրուցելիս խոսեցին նրա ազգանվան մասին: Մեր ֆուտբոլիստը նշեց, որ Շվեդիայում իր ազգանունը հնչում է որպես Կալիզիր, իսկ այն հարցին թե ինչպես է այն հնչում անգլերեն Անդրեն նշեց՝ same(նույնը):
Հավաքականում իր դեբյուտի մասին խոսելով նորեկը նշեց, որ շատ ուրախ ու հպարտ է, որ հանդես է գալու Հայաստանի ազգային հավաքականի կազմում: Նա խոստացավ իր ամբողջ ունակությունը դնել թիմին օգտակար լինելու համար:
«Իսկ այս հրաշալի թիմի ու իմ լավ խաղընկերների հետ հավատում եմ, որ կարող ենք արդյունքի հասնել»,-ասաց նա՝ հավելելով, որ եթե իրեն հաջողվի դառնալ գոլի հեղինակ՝ կտոնի դա ինչպես երբեք»:
Իսկ իրականում հաղթանակը իսկապես հեշտ չի տրվելու: Համենայնդեպս մեր հավաքականի և ռուսական «Ենիսեյի» հարձակվող Արթուր Սարկիսովը կարծում է. «Մեզ ծանր խաղ է սպասվում: Լիխտենշտեյնին հաղթելու համար մենք պետք է կարողանանք ցուցադրել մեր բոլոր հնարավորությունները: Հավաքականն ընդհանրապես հենց նման պայքարի է տրամադրված»:
Իսկ այն հարցին թե իր ակումբակից, դարպասապահ Դավիթ Յուրչենկոն կուժեղացներ մեր հավաքականը Սարկիսովը նշեց. «Դավիթ Յուրչենկոն բարձրակարգ դարպասապահ է անկասկած և բնականաբար հավաքականին օգուտ կտա: Այլ հարց է՝ արդյո՞ք նա կխաղա հավաքականում, թե՞ ոչ»:
Վարդան Մինասյանի հրապարակած՝ հավաքականի ընդլայնված ցուցակում սկզբում տեղ չէր գտել պաշտպան Հովհաննես Համբարձումյանը: Բայց մեկ խաղ անցկացնելով իր նոր ակումբում ու դառնալով գոլի հեղինակ՝ պաշտպանը հրավիրվեց հավաքական.
«Ինձ համար շատ կարևոր էր թիմ ունենալը: Երկար ժամանակ խաղային պրակտիկայից զրկված էի: Ճիշտ է միշտ մարզվել եմ, բայց Կիպրոսում առաջին իսկ հանդիպմանը զգացի խաղի հաճույքը ու ուրախ եմ, որ նորից հավաքականում եմ»:
Նա շեշտեց, որ, ամբողջ թիմի հետ մեկտեղ, տրամադրված է միայն հաղթանակի՝ հիշեցնելով, որ առաջին խաղում հաղթելը շատ կարևոր է և իրենք ունենք այդ ներուժը:
