ԵՐԵՎԱՆ, 18 սեպտեմբերի — Sputnik. Հոկտեմբերի 22-24-ը Հայաստանում նախանշված է «Եվրասիական շաբաթ» միջազգային ցուցահանդեսային համաժողովը, որը ԵԱՏՄ խոշորագույն ամենամյա գործարար միջոցառումն է։ Այս մասին այսօր լրագրողներին հայտնեց «Բիզնես Արմենիա» գործարարների աջակցության խմբի ղեկավար Հայկ Միրզոյանը։
«Այս միջոցառումը մասնակից երկրների գործարարների համար բացառիկ հնարավորություն է նոր գործարար կապեր հաստատելու, արտահանման ու ներմուծման գործարքներ կնքելու համար»,- ասաց Միրզոյանը։
Կազմակերպիչների հաշվարկով գործարար համաժողովին կմասնակցեն շուրջ 2500 ընկերություն ԵԱՏՄ անդամ և ևս 250–ը` երրորդ երկրներից։ Թե որ երկրներից, այս պահին դեռ հայտնի չէ։ Փոխարենը հայտնի է, որ ներկա պահին հայաստանյան 35 ընկերություն արդեն միջոցառմանը մասնակցելու հայտ են ներկայացրել։
Ցուցահանդեսին մասնակցելու համար անհրաժեշտ է գրանցվել մեր էլեկտրոնային կայքում։ Այստեղ ընկերությունները կարող են ընտրել իրենց գործընկեր ընկերություններին և նախապես նրանց հետ հանդիպումներ նշանակել»,- ասաց «Բիզնես Արմենիայի» արտահանման աջակցության կառավարիչ Անահիտ Մկրտչյանը։
«Եվրասիական շաբաթ» ցուցահանդես-համաժողովն ունենալու է հստակ ոլորտային ուղղվածություն` գյուղմթերքի վերամշակում, սննդի արդյունաբերություն, օրգանիկ գյուղատնտեսություն, դեղագործություն, թեթև արդյունաբերություն, ինովացիոն տեխնոլոգիաներ պարունակող շինանյութերի արտադրություն, ՏՏ և ճշգրիտ ճարտարագիտություն, ոսկեգործություն։
Հայաստանում նախանշված համաժողովն արդեն երրորդն է, առաջին երկուսն անցկացվել են 2016թ-ին ՌԴ-ում և 2017թ-ին Ղազախստանում։
Ներկայացնելով նախորդ համաժողովներում Հայաստանի մասնակցության արդյունքները` «Բիզնես Արմենիա» գործարարների աջակցության խմբի ղեկավար Հայկ Միրզոյանը հայտնեց, որ ՌԴ-ում տեղի ունեցած առաջին համաժողովից հետո հայաստանյան ընկերությունները 250 մլն դրամի պայմանագրեր են կնքել` ճշգրիտ ճարտարապետության, իսկ Ղազախստանում տեղի ունեցած համաժողովից հետո` դեղագործության ոլորտում։ Դեղագործական ընկերություններն այժմ աշխատում են այդ պատվերների իրականացման ուղղությամբ և առաջիկայում նախատեսված է նաև հայաստանյան արտադրության դեղամիջոցների գրանցումը ղազախական շուկայում։
«Եվրասիական շաբաթ» գործարար համաժողովն իրականացվում է ամենամյա պարբերականությամբ, Եվրասիական տնտեսական հանձնաժողովի նախաձեռնությամբ, ՀՀ տնտեսական զարգացման և ներդրումների նախարարության և «Բիզնես Արմենիա. Հիմնադրամի աջակցությամբ։
