ԵՐԵՎԱՆ, 24 սեպտեմբերի — Sputnik. ՀՀ վարչապետ Նիկոլ Փաշինյանն աշխատանքային խումբ է ստեղծել՝ գազի գնի ձեւավորման վրա ազդեցություն ունեցող բաղադրիչների ուսումնասիրության համար: Վարչապետի որոշումը հրապարակված է կառավարության պաշտոնական կայքում։
Փաշինյանի որոշմամբ`8 հոգանոց աշխատանքային խումբը կղեկավարի փոխվարչապետ Մհեր Գրիգորյանը։ Խմբում ներգրավված կլինեն նաև ՀՀ էներգետիկ ենթակառուցվածքների եւ բնական պաշարների նախարար Արթուր Գրիգորյանն ու փոխնախարար Գարեգին Բաղրամյանը, վարչապետի գլխավոր խորհրդական Արսեն Գասպարյանը, Հանրային ծառայությունները կարգավորող հանձնաժողովի ներկայացուցիչը։
Խմբի աշխատանքներին կմասնակցեն նաև «Գազպրոմ Արմենիայի» ներկայացուցիչները, մասնավորապես` գլխավոր տնօրեն Հրանտ Թադեւոսյանը, գլխավոր տնօրենի տեղակալն ու գլխավոր ճարտարագետը։
Նշենք, որ «Գազպրոմի» հետ ունեցած պայմանագրով, «Գազպրոմի»` Հայաստանում գործող դուստր կազմակերպությունը` «Գազպրոմ Արմենիան», 1000 խմ գազի դիմաց սահմանին վճարում է 150 դոլար։
Հայաստանի շարքային սպառողը գազի դիմաց վճարում է 290 դոլար, ոչ ապահով խավերը` 80 դոլար, իսկ 10 000 խմ-ից շատ սպառող խոշոր բաժանորդները վճարում են 242 դոլար, ջերմոցային ու վերամշակող ընկերությունները` 212 դոլար։
