ԵՐԵՎԱՆ, 25 սեպտեմբերի — Sputnik. Ղարաբաղյան հիմնախնդրի կարգավորումը պետք է հիմնվի հակամարտության բոլոր մասնակիցների փոխզիջումների վրա։ Sputnik Արմենիա մամուլի կենտրոնում կազմակերպած Երևան-Մոսկվա-Աստանա-Մինսկ տեսակապի ժամանակ այս մասին ասաց ՀՀ վարչապետի խորհրդական Արսեն Գասպարյանը` մեկնաբանելով Ադրբեջանի նախագահ Իլհամ Ալիևի հայտարարությունները։
Ավելի վաղ Ալիևը հայտարարել էր, որ Լեռնային Ղարաբաղը Ադրբեջանի կազմից դուրս երբեք որևէ կարգավիճակ չի ստանա։
«Կարծում ենք, որ Ադրբեջանի բոլոր հայտարարություններն այս փուլում ավելի շուտ արվում են ներքաղաքական կոնտեքստից ելնելով», — ասաց Գասպարյանը։
Վարչապետի խորհրդականի կարծիքով` հակամարտության բոլոր կողմերը հասկանում են, որ եթե հակամարտության վերաբերյալ բոլորի, այդ թվում Արցախի համար ընդունելի որոշում կայացվի, ապա այն հիմնվելու է որոշակի փոխզիջումների վրա։ Գասպարյանի տեսանկյունից, տվյալ դեպքում կարևոր է Արցախի կարգավիճակը։
«Հույս ունենք, որ բանակցությունները կշարունակվեն, և ԵԱՀԿ ՄԽ շրջանակում լուծում կգտնվի», — նշեց Փաշինյանի խորհրդականը։
Նա նաև ընդգծեց, որ այդ հարցը պետք է լուծվի Ստեփանակերտի մասնակցությամբ, ինչի մասին բազմիցս հայտարարել է նաև ՀՀ վարչապետը։
Խորհրդականն ուշադրություն հրավիրեց այն հանգամանքին, որ վերջին մոտ 30 տարվա ընթացքում Արցախում քաղաքական և տնտեսական կառույցներ են ձևավորվել և գործում։
«Բանակցությունների ընթացքում պետք է հաշվի առնվի բոլոր կողմերի դիրքորոշումը, առավել ևս, որ Արցախն արդեն դրանց մասնակցել է», — ասաց Գասպարյանը։
Ըստ նրա` բանակցությունների հենց նման ձևաչափն առավել արդյունավետ կլինի և թույլ կտա իրական առաջընթաց արձանագրել։
Նշենք, որ Հայաստանի և Ադրբեջանի արտգործնախարարներ Զոհրաբ Մնացականյանի և Էլմար Մամեդյարովի` արցախյան կարգավորմանը նվիրված հանդիպումը տեղի կունենա սեպտեմբերի 26-ին Նյու Յորքում։
