ԵՐԵՎԱՆ, 25 սեպտեմբերի — Sputnik. «Միսս Ուկրաինա 2018» տիտղոսից զրկված Վերոնիկա Դիդուսենկոն գեղեցկության մրցույթի պահանջներն ամուսնացած աղջիկների իրավունքների ոտնահարում է համարում։ Այդ մասին հաղորդում են ռուսական ԶԼՄ–ները` հղում անելով «1+1» հեռուստաալիքին։
Բանն այն է, որ Դիդուսենկոն զրկվել է «Միսս Ուկրաինա» տիտղոսից այն բանից հետո, երբ կազմակերպիչներն իմացել են, որ նա խախտել է մրցույթի մի շարք կանոններ` թաքցնելով իր ընտանեկան դրությունը։ Դիդուսենկոն ամուսնացած է եղել և երեխա ունի, ինչը չի համապատասխանում մրցույթի պահանջներին։
Վերոնիկան չի պատրաստվում ինքնակամ հրաժարվել «Միսս Ուկրաինա» տիտղոսից և ուզում է մասնակցել «Միսս աշխարհ» մրցույթին, որը տեղի կունենա 2018թ–ի դեկտեմբերին Չինաստանում։
Սակայն մրցույթի իրավաբանները նշել են, որ նա չի կարող Չինաստան գնալ։ Գոյություն ունեն կանոններ, որոնց Ուկրաինան պետք է հետևի, այլապես երկրի հետագա մասնակցությունն այդ մրցույթին կարող է վտանգվել։
Նոր «Միսս Ուկրաինա 2018»–ի անունը հայտնի կդառնա սեպտեմբերի 30–ին։