ԵՐԵՎԱՆ, 26 սեպտեմբերի — Sputnik. Սիրիայի իշխանությունը մի քանի ամիս առաջ օգնության խնդրանքով դիմել է Հայաստանին, այսօր ճեպազրույցի ժամանակ ասաց ՀՀ ԱԳՆ մամուլի քարտուղար Տիգրան Բալայանը։
«Սիրիայի կառավարության հրավերը եղել է մի քանի ամիս առաջ։ Նրանք նշել էին, որ կողջունեն, եթե Հայաստանը կարողանա Սիրիայում մարդասիրական առաքելություն իրականացնել», — ասաց Բալայանը։
Բարձրաստիճան պաշտոնյաները բազմաթիվ անգամ նշել են, որ Սիրիայում կատարվող իրադարձությունների վերաբերյալ Հայաստանը չի կարող դիտորդի և կրավորական կեցվածք ընդունել։
«Մենք շահառու ենք Սիրիայում, հսկայական պատմամշակութային ժառանգություն և բազմահազարանոց սփյուռք ունենալով», — նշեց Բալայանը։
Նա ցավով նշեց, որ Սիրիայում 120-140 հազար սիրիահայերից այժմ կեսն էլ չի մնացել երկրում։ Եվ անհրաժեշտություն կա պաշտպանելու Սիրիայում մնացած մարդկանց։
Բալայանը նշեց, որ մարդասիրական առաքելությունն աշխատելու է Հայաստանի դրոշի ներքո հիմնականում երկրի հայաբնակ շրջաններում։
Հիշեցնենք, որ ՀՀ պաշտպանության նախարար Դավիթ Տոնոյանը հայտարարել էր, որ մարդասիրական առաքելության շրջանակում Սիրիա կմեկնեն 100 զինվորական` բժիշկներ, սակրավորներ, ինչպես նրանց անվտանգությունն ապահովող անձնակազմը։
Երեկ ՀՀ վարչապետ Նիկոլ Փաշինյանը, ելույթ ունենալով ՄԱԿ-ի Գլխավոր ասամբլեայի 73-րդ նստաշրջանում, հայտարարել է, որ Հայաստանը պատրաստ է ընդլայնել Սիրիայում իր մարդասիրական առաքելությունը, որն ուղղված կլինի այդ երկրում հայ համայնքի կարիքներն ապահովելուն։
