ԵՐԵՎԱՆ, 4 հոկտեմբերի — Sputnik. Երևանի Հ. Էմինի նրբանցքում գտնվող, 110 752 400 դրամ արժեքով և 3046.34 քառ. մետր մակերեսով շենքն ու հարակից հողամասը ՀՀ կառավարության որոշմամբ հանձնվեց Հայ-ռուսական Սլավոնական համալսարանին:
Մինչ այդ շենքն ամրացված էր Վ. Դավթյանի անվան N 149 ավագ դպրոցին:
Կառավարության որոշման համաձայն`այդտեղ կտեղակայվի Սլավոնականի համալսարանի «Ուսմունք» դպրոցը:
Բանն այն է, որ այս մասնաշենքը միջանցքներով կապված է նախկինում Համալսարանին հանձնված մասնաշենքերին, և գտնվում է անմխիթար վիճակում, չունի կենտրոնական մուտք, ջեռուցման համակարգ:
Այն ուրիշ կազմակերպությունների հանձնելու դեպքում,կառավարության համոզմամբ, կխաթարվի համալսարանի «Ուսմունք» դպրոցի բնականոն գործունեությունը:
Դպրոցը հիմնադրվել է 2009-2010 ուսումնական տարում և ունեցել ընդամենը 14 աշակերտ, իսկ 2017-2018 թ.թ. ուսումնական տարում սովորողների թիվը հասել է 218–ի: Դպրոցն իր գործունեությունն իրականացնում է նախկինում համալսարանին հանձնված հինգ մասնաշենքերում: