ԵՐԵՎԱՆ, 4 հոկտեմբերի — Sputnik. Բառացիորեն մի քանի օրից Հայաստանում կկայանա Ֆրանկոֆոնիայի գագաթաժողովը։ Քաղաքի փողոցներում արդեն կարելի է հանդիպել բեյջերով մարդկանց, որոնք ֆրանսերեն են խոսում։ Ոչ պաշտոնական հաշվարկներով` այդ օրերին Հայաստան կգան մոտ 3500 հյուրեր և ավելի քան 1000 զբոսաշրջիկներ։
ԱԳՆ-ը հաղորդում է Ֆրանկոֆոնիայի ընտանիքի մեջ մտնող 84 երկրների 105 պատվիրակությունների այցի մասին ։ Հայաստան են գալու նաև Ֆրանսիայի նախագահ Էմանուել Մակրոնը, Կանադայի վարչապետ Ջասթին Տրյուդոն և այլ բարձրաստիճան պաշտոնյաներ։
Պետությունների ղեկավարները կիջևանեն հինգաստղանի հյուրանոցներում, որոնք ապահովված են անհրաժեշտ ամեն ինչով և համապատասխանում են նրանց պահանջներին, արարողակարգին և, ամենակարևորը, անվտանգությանը, Sputnik Արմենիայի թղթակցի հետ զրույցում ասաց հյուրանոցների հարցերով փորձագետ Մանվել Արևշատյանը։
Նա նշեց, որ Հայաստանում գործում են լյուքս դասի վեց հյուրանոցներ, որոնք համապատասխանում են սահմանված չափանիշներին` համարների քանակը, լողավազանները, ուղղաթիռային հարթակը և այլն։
Սակայն բարձրակարգ հյուրանոցներից մի քանիսը կահավորված են արևելյան ոճով` չափազանց անճաշակ դիզայնով։ Դա վախեցնում է առաջին դեմքերին, նրանք նախընտրում են մնալ բիզնես ոճով կահավորված հյուրանոցներում։
«Բացի այդ կազմակերպիչները նախընտրում են համաշխարհային անունով ցանցային հյուրանոցներ, քանի որ նման հաստատություններում ապրիորի հետևում են բոլոր չափանիշներին։ Հակահրդեհային համակարգը, անձնակազմի որակավորումը, սպասարկման որակը հաստատ չեն հիասթափեցնի։ Կարծում եմ, որ համաշխարհային բրենդերի երևանյան ներկայացուցիչները լիովին համապատասխանում են այդ պահանջներին», — նշեց փորձագետը։
Սակայն դա չի նշանակում, որ բոլոր պատվիրակությունների ներկայացուցիչները կտեղավորվեն հինգաստղանի հյուրանոցներում։ Հյուրերն այնքան շատ են, որ «աստղերի» և կատարյալ սպասարկման հարցն ավտոմատ կերպով մղվում է երկրորդ պլան, իսկ առաջին` տարրական` տեղավորելու հարցը։
«Անշուշտ, բոլորին կտեղավորեն։ Կան շատ հյուրանոցներ, դրանք բոլոր հյուրերին (մոտ 3500) լիովին կարող են տեղ տալ։ Առավել ևս, որ հիմա զբոսաշրջային սեզոն չէ, և ծանրաբեռնվածություն չկա», — նշեց Արևշատյանը։
Բարձրակարգ հյուրանոցների գիդի (Luxury hotels guides) համաձայն` Հայաստանում բազմաթիվ հյուրանոցներից միայն վեցն են համապատասխանում հինգաստղանի հյուրանոցների չափանիշներին` The Alexander, Radisson BLU, Grand Hotel Yerevan, Golden Palace Hotel, Multi Grand Pharaon Hotel, Hotel National։
Այդ հյուրանոցներում սովորական համարի գինը տատանվում է 92 հազար դրամից մինչև 275 հազար դրամ։ Գործում են նաև ավելի քան 30 չորսաստղանի հյուրանոցներ, որտեղ գները տատանվում են 15 հազարից մինչև 168 հազար դրամի սահմաններում։
