ԵՐԵՎԱՆ, 4 հոկտեմբերի — Sputnik. Հոկտեմբերի 19-ին այսուհետ կնշվի քրեակատարողական ծառայողի օրը: Կառավարության առաջարկով համապատասխան փոփոխություն կարվի «Հայաստանի Հանրապետության տոների և հիշատակի օրերի մասին» օրենքում:
Նախագիծն առաջարկած արդարադատության նախարարությունն այս առաջարկը պայմանավորում է քրեակատարողական ծառայողի մասնագիտական օրն առանձնացնելու և նշելու անհրաժեշտությամբ:
Բանն այն է, որ մասնագիտական տոներ ունեն պաշտպանության, ոստիկանության, ազգային անվտանգության, հանրապետական գործադիր մարմինների համակարգերում ծառայողները, իսկ հարկադիր կատարողները համարվում են նրանց հավասարեցված անձինք:
