ԵՐԵՎԱՆ, 16 հոկտեմբերի — Sputnik. Ռուս սահմանապահները կրկին սահմանախախտի են ձերբակալել հայ-թուրքական սահմանին, հաղորդում է Հայաստանում ՌԴ դաշնային անվտանգության ծառայության սահմանապահ վարչության մամուլի ծառայությունը։
«2018թ.–ի հոկտեմբերի 15–ին ծառայություն կատարելու ընթացքում Գյումրիի սահմանապահ ջոկատը նկատել է անհայտ մարդու, որը հատել է պետական սահմանը։ Սահմանախախտն ուշադիր զննել է տեղանքը և փորձել աննկատ տեղաշարժվել` օգտագործելով տեղանքի ռելիեֆը», – ասվում է հաղորդագրությունում։
Որոշ ժամանակ անց սահմանախախտի շարժման ենթադրյալ երթուղում սահմանապահները դարան են մտել:
Սահմանապահ ջոկատի զինծառայողների պրոֆեսիոնալ գործողությունների շնորհիվ սահմանախախտն օպերատիվ կերպով ձերբակալվել է։
Նախնական տեղեկություններով` ձերբակալվածը Թուրքիայի Հանրապետության քաղաքացի է: Հայ-թուրքական սահմանն ապօրինի հատելու նպատակը կպարզեն իրավասու մարմինները:
Սահմանված օրենսդրական կարգի համաձայն՝ սահմանախախտը փոխանցվել է Հայաստանի իրավապահ մարմիններին: