ԵՐԵՎԱՆ, 17 հոկտեմբերի — Sputnik. Ռուսաստանը պատրաստ է Հայաստանի բնակչությանը բարձր տեխնոլոգիական ռուսական դեղորայք առաջարկել։ Այս մասին այսօր Երևանում ասաց Ռուսաստանի արդյունաբերության և առևտրի առաջին փոխնախարար Սերգեյ Ցիբը Expo Russia — Armenia 2018 միջազգային արդյունաբերական ցուցադրության բացման ժամանակ։
«Գիտեմ, որ ռուսական դեղագործական ընկերությունները հայկական շուկայում շատ ակտիվ են գործում։ Հաշվի առնելով, որ վերջին 5-7 տարիների ընթացքում Ռուսաստանում զգալի տեխնոլոգիական հնարավորություններ են ստեղծվել բարդ դեղորայքի արտադրման համար, մենք պատրաստ ենք դա տրամադրել մեր հայ գործընկերներին, առաջարկել Հայաստանի բնակչությանը բարձր տեխնոլոգիական ռուսական արտադրանք», — ասաց Ցիբը։
Նա նշեց, որ շատ կարևոր է ընդլայնել երկրների համագործակցությունը ոչ միայն ընկերությունների գործընկերության մակարդակով, այլև տեխնոլոգիաների փոխանցման հարցում։
«Կան բազում ոլորտներ, որոնցում մենք այսօր համագործակցության հնարավորություն ենք տեսնում, ընդլայնում ենք փոքր ու միջին բիզնեսի թափանցումը, ինչը վկայում է ընդհանուր առմամբ տնտեսության զարգացման մասին», — ավելացրեց փոխնախարարը։
Նա նաև նշեց, որ ԵԱՏՄ երկրները պետք է հնարավորինս շատ աշխատեն Միության ներսում ապրանքի անարգել շրջանառության ու երրորդ երկրների համար մրցունակ արտադրանք ստեղծելու ուղղությամբ։
«Մենք շատ ապրանքների հարցում միասնական շուկա ենք ստեղծում, ու ԵԱՏՄ շուկայի ներսում անարգել շրջանառությունը թիվ մեկ խնդիրն է։ Պետք է վերացնել բոլոր խոչընդոտները միասնական շուկայի շրջանակում ու միասին աշխատել մրցունակ ապրանքի ստեղծման ուղղությամբ, որպեսզի այդ ապրանքը եվրասիական հարթակից արտահանվի այլ երկրներ», — ասաց Ցիբը։
Այդ առնչությամբ նա նշեց, որ Հայաստանի ու Ռուսաստանի համատեղ խնդիրը պետք է լինի ռուսական ու հայկական ընկերությունների առաջխաղացումն այլ շուկաներում։
