Ոստիկանության բաժնում քաղաքացուն խոշտանգելու կասկածանքով ձերբակալված երեք ոստիկաններից մեկի մայրը բողոքում է ՀՀ ոստիկանապետի տեղակալ Աղասի Կիրակոսյանին։
«Իմ էրեխեն էդ էրեխեն չի։ Եթե իմ էրեխեն հանցագործություն ա արել, մարդ ա սպանել, կասեմ` տարեք, ինչքան կուզեք, պատժեք։ 100 տարի տվեք։ Իմ էրեխեն ոչ քուն ունի, ոչ դադար։ Ո՞ւմ համար ա ծառայում, որ էսօր տանեք, ըտենց անեք»,- ասում է նա։
Նշենք, որ Հատուկ քննչական ծառայությունը երեկ տեղեկություն էր տարածել, ըստ որի` ձերբակալվել են Ոստիկանության Գեղարքունիքի մարզային վարչության Սևանի բաժնի քրեական հետախուզության բաժանմունքի պետն ու նույն բաժանմունքի երկու օպերլիազորները։
Նրանց կասկածում են ՀՀ ոստիկանության Սևանի բաժնում խմբի կազմում Ա. Մ.-ին խոշտանգելու մեջ: Ա. Մ.-ն ՀՀ հատուկ քննչական ծառայություն դիմում էր ներկայացրել այն մասին, որ 2018 թվականի հոկտեմբերի 7-ին ոստիկանության Սևանի բաժնի երեք աշխատակիցներ Սևան քաղաքում գործող բուքմեյքերական ընկերության գրասենյակի մոտից իրեն տեղափոխել են ոստիկանության Սևանի բաժին և ծեծի ենթարկել: Նախաքննությունը շարունակվում է:
