ԵՐԵՎԱՆ, 25 հոկտեմբերի — Sputnik. Կառավարության այսօրվա՝ հոկտեմբերի 25-ի նիստում որոշվեց ՀՀ Ազգային ժողովի նախագահին առաջարկվել ԱԺ արտահերթ նիստ գումարել համաներման հարցը քննարկելու համար:
Նիստը կգումարվի հոկտեմբերի 31-ին, ժամը 11:00-ին: Հարցը ներկայացրեց արդարադատության նախարարի պաշտոնակատար Արտակ Զեյնալյանը` նշելով, որ նիստի օրակարգում է «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի նախագիծն է:
ՀՀ վարչապետի ժամանակավոր պաշտոնակատար Նիկոլ Փաշինյանը հետարքրքվեց, թե արդյոք այդ օրը չի համընկնում վարչապետի ընտրության հետ, փոխվարչապետի ԺՊ Արարատ Միրզոյանը նշեց, որ օրը նույնն է, բայց ժամային առումով համընկնում չկա:
«Եթե համոզված ենք, ուրեմն ընդունենք»,- ամփոփեց Նիկոլ Փաշինյանը:
Նշենք, որ «Համաներում հայտարարելու մասին» օրենքի նախագիծը կքննարկվի 24-ժամյա ռեժիմով: Մինչ այդ նախագիծը կքննարկվի ԱԺ պետաիրավական և մարդու իրավունքների պաշտպանության հարցերի մշտական հանձնաժողովի նիստում:
Հիշեցնենք, որ ավելի վաղ որոշում էր կայացվել, որ Համաներման հարցը պետք է քննարկվի հոկտեմբերի 29-ին մեկնարկող ԱԺ արտահերթ նիստում: Այսօր ԱԺ նախագահ Արա Բաբլոյանը որոշում է կայացրել, որով համաներում հայտարարելու մասին ՀՀ օրենքի նախագիծը հանել է հոկտեմբերի 29-ի ԱԺ արտահերթ նիստի օրակարգից: