ԵՐԵՎԱՆ, 26 հոկտեմբերի — Sputnik. ՀՀ էներգետիկայի նախարությունը կշարունակի ստուգել արտասահմանյան վարկերն ու պետական տենդերները։ Այս մասին այսօր լրագրողներին ասաց ՀՀ էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանը։
Նա հաստատեց Պետական վերահսկողության ծառայության ղեկավար Դավիթ Սանասարյանի երեկվա հայտարարությունը` «Բարձրավոլտ էլեկտրական ցանցերում» ֆինանսական խախտումների մասին։
«Խախտումները հիմնականում եղել են կապալառուի ընտրության տենդերներում։ Առաջիկայում 140 միլիոն դրամ պետք է բյուջե վերադառնա։ Մնացած մանրամասները մեզ կհայտնի Վերահսկողության ծառայությունը», — ասաց նա։
Հետագայում նախարարությունը կուսումնասիրի` ինչպես օպտիմալացնել այն ծախսերը, որոնք կապված են էլեկտրացանցի շինարարության համար տրամադրվող արտասահմանյան վարկային ծրագրերի հետ։ Բաղրամյանը նշեց, որ շինարարությունից չեն հրաժարվելու, պարզապես փորձելու են պարզել` ինչպես է կարելի աշխատանքի նույն ծավալը ավելի քիչ գումարով իրականացնել։
Հիշեցնենք` հիմա Հայաստանում արտասահմանյան վարկերով մի քանի ծրագիր է իրականացվում էներգետիկայի ոլորտում` Համաշխարհային բանկի վարկով բարձր լարման ենթակայանների վերանորոգում, Իրան տանող նոր բարձրավոլտ էլեկտրահաղորդման գծի կառուցում, դեպի Վրաստան տանող նոր ցանցի նախագծում։ Եվս մեկ ծրագիր, որով էլեկտրահաղորդման օդային գծեր են կառուցվել երկրի կենտրոնից դեպի հարավ (Հրազդանից Շինուհայր), ավարտվել է։
