ԵՐԵՎԱՆ, 27 հոկտեմբերի — Sputnik. Երեկ՝ հոկտեմբերի 26-ին, թունավորման դեպք է գրանցվել Արարատի մարզում։ Ժամը 09։50-ի սահմաններում «Արարատ» բժշկական կենտրոնից հայտնել են, որ բժշկական կենտրոնի հերթապահ խումբը հիվանդանոց է տեղափոխել «սուր սննդային թունավորում, սուր գաստրոէնտերոկոլիտ՝ միջին ծանրության» ախտորոշմամբ մի քանի քաղաքացու։
Ինչպես հայտնում է shamshyan.com-ը, հիվանդանոց մեկնած ոստիկանները պարզել են՝ հիվանդանոց են տեղափոխվել Արմաշ գյուղի բնակիչներ՝ 53-ամյա Անահիտ Բաբայանը, 60-ամյա Գառնիկ Ղազարյանը, 26-ամյա Արևհատ Սարգսյանը, 17-ամյա Թամարա Ղազարյանը, 15-ամյա Գայանե Բադալյանը, 13-ամյա Գագիկ Բադալյանը և Ռուսաստանի Դաշնության Եկատերինբուրգ քաղաքի բնակիչներ՝ 34-ամյա Արման Գինոսյանն ու 32-ամյա Հովհաննես Ավագյանը։
Ոստիկանները պարզել են նաև, որ նշված անձինք Գ. Ղազարյանի տանը նախաճաշի ժամանակ կերել են կոլոլակով ապուր, որից հետո բոլորի ինքնազգացողությունը վատացել է։
Փաստի առթիվ Ոստիկանության Արարատի բաժնի հետաքննչական բաժանմունքում նյութեր են նախապատրաստվում։
