ԵՐԵՎԱՆ, 6 նոյեմբերի – Sputnik. Ասֆալտին փռելու գործընթացն ավարտված չէ, ոստիկանությունը շարունակում է իրականացնել վարչապետի այդ հանձնարարությունը: Այս մասին այսօր ԱԺ-ում լրագրողների հետ զրույցում ասաց ՀՀ ոստիկանության պետ Վալերիյ Օսիպյանը:
«Լինում են այդպիսի գործընթացներ, նախկինում էլ են եղել»,- ասաց Օսիպյանը՝ հավելելով, որ դրա արդյունքում օլիգարխներն ու նրանց թիկնապահներն ավելի օրինապահ են դարձել:
Օսիպյանն անդրադարձավ նաև հայաստանյան մեծահարուստների մոտ կուտակված զենքի խնդրին, մասնավորապես՝ «Բարգավաճ Հայաստան» կուսակցության առաջնորդ Գագիկ Ծառուկյանի այն հայտարարությանը, թե ինքը 75 միավոր զենք ունի և որ տղամարդը պետք է կրակի:
Ոստիկանապետը նշեց, որ օրենքը չի սահմանափակում զենքի քանակը: Կարևոր է, որ դրանք լինեն օրինական, ու անհատն այդ զինատեսակները կրելու իրավունք ունենա:
Արձագանքելով Ծառուկյանի այն հայտարարությանը, թե մեկը զենք է սիրում, մեկը՝ ջութակ, Օսիպյանն ասաց, որ իր համար, իհարկե, որպես երաժշտական գործիք, ջութակի հնչյուններն ավելի հաճելի են։
