ԵՐԵՎԱՆ, 14 նոյեմբերի - Sputnik. Աշխատասենյակը չպետք է փչացնի մարդուն, ու դա տեղի չի ունենա։ Այս մասին ասաց ՀՀ վարչապետի պաշտոնակատար Նիկոլ Փաշինյանը` ելույթ ունենալով ԱԺ–ի հարց ու պատասխանի ընթացքում։
«Ծառուկյան» դաշինքի պատգամավոր Լուիզա Սարգսյանը որոշեց գործընկերներին շեղել անվերջ վիճաբանություններից. նա Փաշինյանից հետաքրքրվեց նրա գրած «Չար տնակի պատմությունը» մանկական գրքից։ Վարչապետի պաշտոնակատարը հեքիաթը գրել է, երբ դեռ պատգամավոր էր։ Սարգսյանը հարցրեց` ինչպես է հիմա Փաշինյանին հաջողվում հեռու մնալ այդ «չար տնակից»։
Սյուժեով այն հիշեցնում է Եվգենի Շվարցի «Սպանել վիշապին» պիեսն ու նույնքան հայտնի ֆիլմը, որտեղ գլխավոր դերերում են Ալեքսանդր Աբդուլովն ու Օլեգ Յանկովսկին։
«Հիմա առիթ է, ասեմ՝ չար տնակը պայմանական ասած կաբինետն է, որը հաճախ սովորություն ունի մարդկանց կլանել, ջնջել նրանց հիշողությունը, արժեզրկել նրանց արժեքները։
«Եթե այսքան անկեղծացա, չար տնակ ասելով՝ նկատի եմ ունեցել ԱԺ-ն, քանի որ առաջիկա անելիքների մասին էի մտածում, մտածում էի, որ ԱԺ խմբակցության ղեկավարի աշխատասենյակը կերել է իմ հիշողությունը, ուտում է իմ արժեքները, ինձ շեղում իմ քաղաքական առաքելությունից, և ես ուրախ եմ, որ մենք կարողացանք այդ տնակի ճիրաններից դուրս պրծնել և վերադառնալ այն առաքելությանը, որով ես սկսել եմ իմ քաղաքական առաքելությունը: Հույս ունեմ, որ վարչապետի պաշտոնը նման դերակատարում չի ունենա»,- ասաց Նիկոլ Փաշինյանը:
