ԵՐԵՎԱՆ, 19 նոյեմբերի — Sputnik. Խորհրդարանական ընտրություններում բոլոր քաղաքական գործիչները մրցելու են, ու դա նորմալ է։ Այս մասին այսօր լրագրողներին ասաց ՀՀ արդարադատության նախարարի պաշտոնակատար Արտակ Զեյնալյանը։
Իր` «Հանրապետություն» կուսակցությունը ընտրության է գնում «Մենք» դաշինքի կազմում, «Ազատ դեմոկրատներ» կուսակցության հետ միասին։
Մրցակցության մեջ են լինելու ինչպես տարբեր կուսակցությունները, այնպես էլ քաղաքական գործիչները մեկ կուսակցության ներսում։ Նրանք առաջադրվում են տարբեր ընտրատարածքներում, աջակցում իրենց կուսակցություններին, սակայն մրցակցում են նաև միմյանց հետ` ԱԺ–ում մանդատ ստանալու համար։
Սակայն դա չի նշանակում, որ ընտրությունները պետք է ագրեսիվ լինեն։ «Իշխանություն» և «ընդդիմություն» բառերն այժմ այլ կերպ պետք է հնչեն։ «Ընդդիմադիր» և «թշնամական» բառերն այսուհետ հոմանիշներ չպետք է լինեն։
«Հակառակը, այս ընտրությունները պետք է ամենաազնիվը դառնան։ Որևէ կասկած չպետք է մնա ընտրության արդյունքների վերաբերյալ։ Դրանցից է կախված`արդյո՞ք ես կմնամ նախարարի պաշտոնում, թե՞ ոչ։ Սակայն, ինչպես ես արդեն ասացի` այս պայքարը պետք է ընկալել առանց թշնամանքի», – հայտարարեց Զեյնալյանը։
Հիշեցնենք, որ ԱԺ արտահերթ ընտրությունները Հայաստանում տեղի կունենան դեկտեմբերի 9-ին։ Ընտրություններին Նիկոլ Փաշինյանն ու «Ելք» դաշինքի նրա նախկին գործընկերները կմասնակցեն տարբեր քաղաքական դաշինքների կազմում։
