ԵՐԵՎԱՆ, 26 նոյեմբերի – Sputnik. Հայաստանի թռչնարտադրողների միությունը խոստանում է Ամանորին բավարար քանակի ձու ապահովել: Այս մասին նշվում է միության տարածած նամակում:
Վերջին տարվա ընթացքում տեղական ֆաբրիկաներն ու խոշոր ֆերմերային տնտեսությունները ապահովել են ձվի ողջ պահանջարկը: Ապրիլ-սեպտեմբեր ամիսներին նույնիսկ արձանագրվել է գերարտադրություն: Այժմ առաջարկն ու պահանջարկը կարգավորվել է, ձվի գինը՝ կայունացել, իսկ անցած տարվա համեմատ՝ փոքր-ինչ նվազել: Անցյալ տարի ֆաբրիկաները ձու էին բաց թողնում խանութներին միջինում 60 դրամով (ներառյալ ԱԱՀ), իսկ այսօր արդեն՝ 52 դրամով (խոսքը 01 չափսի ձվի մասին է, որն ամենատարածվածն է շուկայում):
Իրատեսորեն գնահատելով իրենց արտադրական հնարավորությունները՝ արտադրողները պարտավորվել են մինչև տարեվերջ, հատկապես Նոր տարվա առևտրի շրջանում, ապահովել ձվի անհրաժեշտ պահանջարկը՝ չավելացնելով, իսկ հնարավորության դեպքում, կախված սպառման ծավալներից, նաև նվազեցնելով այս պահին եղած գինը:
«Սակայն ստիպված ենք ուշադրություն դարձնել արագ գերեկամուտներ ստանալու որոշ տնտեսվարողների բազմիցս արձանագրված գործելաոճին: Ըստ այդմ, «Թռչնարտադրողների միությունը» դիմում է ՀՀ վարչապետին, ՀՀ կառավարությանը, համապատասխան պատկան մարմիններին՝ ՀՀ ԿԱ սննդամթերքի անվտանգության տեսչական մարմնին, ՀՀ տնտեսական մրցակցության պաշտպանության պետական հանձնաժողով՝ արգելելու օրենսդրության պահանջներին չհամապատասխանող, անորակ, առանց մակնշման ձվի ներմուծումը Հայաստան», - նշվում է նամակում:
Տեղական տնտեսվարողները շեշտում են, որ անբարեխիղճ ներկրումը ստեղծում է անհավասար մրցակցություն: Ներկրված ձուն ավելի էժան է, սակայն հաճախ մակնշված չի լինում և կասկածելի որակ ունի: Դրանից բացի, այս պահին Ռուսաստանի հարավային շրջաններում արձանագրված է թռչնի գրիպ, որի պատճառով այնտեղից ձվի ու թռչնի մսի տեղափոխման վրա գործում են սահմանափակումներ:
«Այս պահին ակնկալում ենք ՀՀ իշխանությունների գործուն աջակցությունը տնտեսվարողին, որն անհրաժեշտ է տեղական թռչնարտադրության ոլորտի հետագա զարգացման համար», - նշվում է նամակում:
Նշենք, որ այս տարվա հունվար-սեպտեմբեր ամիսներին Հայաստանում ձվի արտադրությունը, նախորդ տարվա նույն ամիսների համեմատ, աճել է ավելի քան 15%-ով:
