ԵՐԵՎԱՆ, 3 դեկտեմբերի — Sputnik. Թուրքիայի կառավարությունը չի արտաքսում Հայաստանից եկած անօրինական ներգաղթյալներին։ Բուենոս Այրեսում այս մասին հայտարարել է Թուրքիայի նախագահ Ռեջեփ Թայիփ Էրդողանը` պատասխանելով հայ լրագրողի հարցին։
Prensa Armenia արգենտինա–հայկական պարբերականը հայտնում է, որ լրագրողներից մեկը Էրդողանին հարց է ուղղել Թուրքիայում ազգային փոքրամասնությունների իրավունքների մասին` ավելացնելով. «Ես ցեղասպանություն տեսած հայերի հետնորդներից եմ»։
«Չի կարելի Թուրքիային մեղադրել Հայոց ցեղասպանության համար։ Պետք է հարցը թողնել պատմաբաններին և տեսնել, թե նրանք ինչ կասեն։ Եվ մենք պատրաստ ենք մասնակցել ցանկացած բանավեճի», – պատասխանել է Էրդողանը։
Հետո Էրդողանը փոխել է թեման` հայտարարելով, որ Թուրքիայի այսօրվա իշխանությունը լավ է վերաբերվում հայերին։
«Գիտե՞ք` որքան հայեր է ապրում իմ երկրում։ 100 հազարավոր։ Նրանցից մոտ 30 հազարը Թուրքիայի քաղաքացիներ են, մնացածն ապրում են առանց փաստաթղթերի։ Եվ մենք դա թույլ ենք տվել նրանց։ Ոչ մի խտրականության չեն ենթարկվում քաղաքացիության պատճառով, և մենք ոչ ոքի չենք արտաքսել դրա պատճառով։ Մենք շատ մարդկային ենք մեր պահվածքում և կշարունակենք այդպիսին մնալ», – ասել է Էրդողանը։
Հարավային Ամերիկայի ազգային հայկական խորհուրդն այդ մասին հայտարարություն է տարածել. «Այդ պատասխանը ցինիկ է մի շարք պատճառներով։ Թուրքիայում շարունակում է գործել Քրեական օրենսգրքի 301–րդ հոդվածը, որի համաձայն` մտավորականության ներկայացուցիչներին, այդ թվում` պատմաբաններին, շարունակում են քրեորեն հետապնդել Հայոց ցեղասպանության մասին հիշատակության համար։»
Հիշեցնենք, որ Էրդողանի` Արգենտինա կատարած այցի նախօրեին հայ համայնքը բողոքի ակցիա է անցկացրել Բուենոս Այրեսի թուրքական դեսպանատան մոտ։
