ԵՐԵՎԱՆ, 7 դեկտեմբերի — Sputnik. ՀԱՊԿ գլխավոր քարտուղարի նշանակման մասին որոշում դեռ չի կայացվել, ուրբաթ լրագրողներին հայտարարել է ՌԴ նախագահի մամուլի քարտուղար Դմիտրի Պեսկովը։
«Ոչ, հարցը չի լուծվել, աշխատանքը շարունակվելու է», – ասել է նա։
Հիշեցնենք, որ դեկտեմբերի 6–ին Բելառուսի նախագահ Ալեքսանդր Լուկաշենկոն Բարձրագույն եվրասիական տնտեսական խորհրդի նիստից հետո լրագրողներին հայտնել էր, որ հաջողվել է պայմանավորվածություն ձեռք բերել ՀԱՊԿ գլխավոր քարտուղարի նշանակման մեխանիզմի վերաբերյալ և տեղեկացրել, որ կազմակերպությունը կգլխավորի Բելառուսի ներկայացուցիչը։
ՀՀ վարչապետի պաշտոնակատարի մամուլի քարտուղարն այդ տեղեկությունը հերքել էր` պարզաբանելով, որ ՀԱՊԿ գլխավոր քարտուղարի հարցը չի որոշվել։
Պեսկովը նշել է, որ ԵԱՏՄ առաջնորդների զրույցի ընթացքում օրակարգից դուրս այդ հարցին (ՀԱՊԿ գլխավոր քարտուղարի նշանակման) անդրադարձ է եղել Բելառուսի նախագահի նախաձեռնությամբ։
«Սա նորմալ պրակտիկա է. պետության ցանկացած ղեկավար կարող է շոշափել այն հարցերը, որոնք կարևոր է համարում», – ասել է Պեսկովը` ավելացնելով, որ այդ պահին սեղանի շուրջ ՀԱՊԿ բոլոր անդամները ներկա չէին։
ՀԱՊԿ գլխավոր քարտուղարի պաշտոնը թափուր էր մնացել Հայաստանի կողմից իր ներկայացուցիչ Յուրի Խաչատուրովին հետ կանչելուց հետո։ Հայրենիքում նրա նկատմամբ քրեական գործ է հարուցված։ Խաչատուրովը մեղադրվում է 2008 թվականի մարտի 1-ի հետընտրական իրադարձությունների ժամանակ սահմանադրական կարգը տապալելու մեջ։
