ԵՐԵՎԱՆ, 8 դեկտեմբերի –Sputnik. «Մատչ ՏՎ» հեռուստաընկերության գլխավոր տնօրեն, հեռուստաաստղ Թինա Կանդելակին ցուցադրել է Չեչնիայի ղեկավար Ռամզան Կադիրովի էպիկական վերադարձը Instagram։ Համապատասխան տեսանյութը Կանդելակին տեղադրել է սոցցանցի իր էջում։
«Կադիրովի բացառիկ վերադարձը Instagram», – տեսանյութին կից գրել է Թինան։
20 ժամվա ընթացքում տեսանյութը դիտել են ավելի քան 250 հազար անգամ։
«Եվ այսպես, ընկերներ, երկու կարևոր և ձեզ հուզող բան. Ռամզան Ախմատովիչ, արդյո՞ք կարելի է սեղմել կանանց ձեռքը», – հարցրել է Կադիրովին Կանդելակին։
Ինչին ի պատասխան Չեչնիայի առաջնորդն ասել է, որ կարելի է, եթե հետին մտքեր չկան։ Հարցին, թե ինչու էջ չունի Instagram–ում, նա պատասխանել է. «Մեզ ԱՄՆ–ում չեն սիրում»։
Կանդելակին առաջարկել է իր Instagram–ի միջոցով դիմել ամերիկացիներին։
«Խնդիր ունեմ անգլերենի և ռուսերենի հետ, բայց դիմում եմ չեչեներեն։ Միևնույնն է, ես ձեզ կհասնեմ։ Կորեք գրողի ծոցը, ինձ ձեր Instagram–ը պետք չէ, Թինան է սադրել», – կատակել է Կադիրովը։
Մարդիկ տարաբնույթ մեկնաբանություններ են գրել տեսանյութի տակ։ Ոմանք հավանել են Կանդելակի–Կադիրով տանդեմը, մյուսները` զայրացել դրանից։
Հիշեցնենք, որ Թինաթին Կանդելակին ծնվել է Թբիլիսիում 1975 թվականի նոյեմբերին։ Հայրը` Գիվի Կանդելակին, մասնագիտությամբ տնտեսագետ է, մայրը` Էլվիրա Ալավերդյանը` բժիշկ։ Նա երկու երեխա ունի գործարար Անդրեյ Կոնդրախինի հետ ամուսնությունից։ Ամուսնուց բաժանվել է 2010 թվականին։ 2014 թվականին ամուսնացել է գործարար Վասիլի Բրովկոյի հետ։
