ԵՐԵՎԱՆ, 13 դեկտեմբերի – Sputnik. Ավտոներմուծողները չպետք է խուսափեն հարկերից նվիրատվությունների միջոցով։ Այս մասին այսօր կառավարության նիստից հետո լրագրողներին ասաց Պետական եկամուտների կոմիտեի նախագահ Դավիթ Անանյանը։
Այս տարվա հունիսի 1-ից 2-րդ մեքենայի առուվաճառքի դեպքում, երբ այն որպես նվիրատվություն է ձևակերպվում, 20 տոկոս հարկ է գանձվում։
Այսօր ավտոներմուծողներն ու ավտոմեքենաների առուվաճառք իրականացնողները կառավարության շենքի մոտ բողոքի ցույց էին կազմակերպել և բողոքում էին այդ օրենքից։
Անանյանն ընդգծեց, որ կառավարությունը չի պատրաստվում չեղարկել օրենքը, քանի որ բոլորը պետք է հարկ վճարեն։
«Բոլորդ բերում եք, նվիրատվություն եք ձևակերպում, որ հարկ չտաք, չէ՞։ Մեքենան բերելն ու օտարելը բիզնես է։ Երբ դոշ եք ծեծում ու ասում, որ մեքենա եք ուզում նվիրել ու հարկ չտալ, մտածեք` ինչ եք խոսում։ Եկեք ազնիվ լինենք, մենք չենք կարող աչք փակել նրա վրա, որ դուք մեքենա ներմուծեք ու հարկ չտաք»,–ասաց նա։
Նշենք` Հայաստանում ավտոմեքենաների վաճառքով զբաղվող անհատների թիվը մի քանի հարյուրի է հասնում։ Նրանք տարեկան մի քանի մեքենա են վաճառում, հիմնականում` էժան։ Փորձագետների գնահատականով` հանրապետությունում մեքենաների վաճառքի մոտ 95%–ն իրականացնում են դիլերներն ու ավտոշուկաները։ Ավտոսրահներից մեքենաներ են գնում միայն ունևորները, խոշոր ձեռնարկություններն ու միջազգային կազմակերպությունները։
