ԵՐԵՎԱՆ, 15 դեկտեմբերի — Sputnik. Ռոբերտ Քոչարյանի որդին հարցաքննվել է «Կոնգրես» հյուրանոցի օտարման գործով, այսօր հրավիրված ասուլիսի ժամանակ ասաց ԱԱԾ տնօրեն Արթուր Վանեցյանը։
«Հարուցվել է քրեական գործ։ Ես մի անգամ արդեն սխալ արտահայտություն եմ օգտագործել։ Պետք էր ասել` ապօրինի ձեռք բերված գումարներով», - ասաց Վանեցյանը։
Նրա խոսքով՝ այդ գործով Սեդրակ Քոչարյանը հրավիրվել է ԱԱԾ քննչական բաժին և հարցաքննվել՝ որպես վկա։ Վանեցյանը նշեց, որ հիմա Սեդրակ Քոչարյանը պահպանում է վկայի կարգավիճակը, քանի դեռ այդ գործով մեղադրյալներ չկան։
Ավելի վաղ Վանեցյանը հայտարարել էր, որ Քոչարյանների ընտանիքը ժամանակին «Կոնգրես» հյուրանոցը ձեռք է բերել ՝ վճարելով 6 միլիոն դոլար կաշառք։
Ավելի ուշ նա ասել էր, որ էմոցիոնալ հայտարարություն է արել։ Վանեցյանը նշել էր նաև, որ կոռուպցիոն գործարքին Քոչարյանի առնչությունը հաստատող որոշակի փաստեր եղել են, բայց թերի են եղել։
