ԵՐԵՎԱՆ, 18 դեկտեմբերի — Sputnik. ՀՀ կենտրոնական բանկն այս և նախորդ տարիների միջև Հայաստանից դուրս բերվող գումարների էական տարբերություն չի արձանագրել։ Այսօր` դեկտեմբերի 18-ին, լրագրողների հետ հանդիպմանը, անդրադառնալով ֆինանսական արտահոսքերի մասին մամուլում առկա լուրերին` այս մասին ասաց ԿԲ խորհրդի անդամ Արթուր Ստեփանյանը։
Իսկ Հայաստանից արտերկիր փոխանցումները, նրա դիտարկմամբ, հիմնականում պայմանավորված են մասնավոր գործարքների ու ինտերնետային առևտրի դիմաց վճարումներով։
«Եթե նայենք աշխարհագրությունը, շատ հետաքրքիր է` Չինաստան, ԱՄԷ, ունենք նաև ԱՄՆ, Միացյալ Թագավորություն, որտեղ շատ ավելի մեծացել են արտերկրում սովորող մեր երեխաների ուսման վարձերի փոխանցումները։ Հայաստանից արտերկիր մասնավոր փոխանցումը միջինը 2800 դոլար է, որից երևում է, որ մեծ մասամբ առևտրին է ուղղված, իսկ ներս փոխանցումները` 500 դոլար։ Դա էլ ցույց է տալիս, որ մեր արտագնա աշխատողներն իրենց աշխատավարձերն են փոխանցում այստեղ»,– ասաց Ստեփանյանը` հավելելով, որ այս ցուցանիշներում Կենտրոնական բանկը ֆինանսական արտահոսքերի միտում չի նկատում։
ԿԲ ֆինանսական համակարգի կայունության ու զարգացման վարչության պետ Անդրանիկ Գրիգորյանն էլ ավելացրեց, որ իրենք ֆինանսական համակարգից որևէ արտահոսք չեն տեսնում։
Հակառակը, նրա խոսքով, ֆինանսական համակարգում այս տարի նախորդների համեմատ նույնիսկ կապիտալի աճ է գրանցվել` ավանդների և հատկապես` դրամային ավանդների տեսքով։
