ԵՐԵՎԱՆ, 19 դեկտեմբերի — Sputnik. Ստավրոպոլում Անվտանգության դաշնային ծառայության (ԱԴԾ) աշխատակիցները չեզոքացրել են «Իսլամական պետություն» ահաբեկչական կազմակերպության զինյալներին, որոնք կրակ են բացել իրավապահների ուղղությամբ։ Այս մասին հայտնում է ՌԻԱ Նովոստին` հղում անելով ԱԴԾ մամուլի ծառայությանը։
Նշվում է, որ զինված դիմադրության ժամանակ նրանք չեզոքացվել են։ Զինյալների թիվը չի նշվում։
«Ռուսաստանի ԱԴԾ աշխատակիցները չեն տուժել», – ընդգծել են գերատեսչությունից։
Քրեական գործ է հարուցվել ահաբեկչություն պատրաստելու, ահաբեկչական կազմակերպություն ստեղծելու և ապօրինի զենք կրելու մասին։ Այժմ քննություն է ընթանում։
Ավելի վաղ ԱԴԾ տնօրեն Ալեքսանդր Բորտնիկովը հայտնել էր, որ 2018 թվականին Ռուսաստանում 65 ահաբեկչի են ոչնչացրել, որոնցից 10-ը խմբի ղեկավարներ են եղել։ Ձերբակալել են 236 շարքային զինյալի և ահաբեկիչների 589 հանցակցի։ Հատուկ ծառայությունների աշխատակիցներն ընդհանուր առմամբ կանխել են 37 խմբավորման գործունեություն, որոնք ահաբեկչություններ են նախապատրաստել Դաղստանում, Ինգուշեթիայում, Չեչնիայում և Ստավրոպոլի երկրամասում։
