ԵՐԵՎԱՆ, 22 դեկտեմբերի — Sputnik. Էջմիածնում մի քանի տասնյակ մարդիկ բողոքի ակցիա են անցկացնում և պահանջում, որ գեներալ Մանվել Գրիգորյանին կրկին կալանավորեն։
Ակցիայի մասնակիցները հիմնականում երիտասարդներ ու պատանիներ են, որոնք մեքենաներով փակել են քաղաքի որոշ փողոցները։
«Մենք պետք է կաթվածահար անենք Էջմիածնի, հետո Երևանի երթևեկությունը, որպեսզի դատական համակարգը հասկանա, որ ծառայում է ժողովրդին, ոչ թե 25 միլիոնին (գրավի չափը – խմբ․)», - ասաց ակցիայի կազմակերպիչներից մեկը։
Նրա խոսքով՝ այդ գումարի դիմաց չի կարելի ազատ արձակել մի մարդու, որը «25 տարի դիկտատուրայի մեջ է պահել քաղաքը»։
Նա կարծում է, որ Գրիգորյանը երեք անգամ ավելի շատ զենք ունի, քան հայտնաբերել են իրավապահ մարմինները, և այդ զենքերը կարող են օգտագործվել մարդկանց ու քաղաքի դեմ։
Երիտասարդի խոսքով՝ Գրիգորյանին ազատ արձակելը «քաղաքական դիվերսիա է» նոր իշխանության դեմ։ Նրանք աջակցում են վարչապետի պաշտոնակատար Նիկոլ Փաշինյանին, բայց պատրաստ են ճնշում գործադրել արդարադատության համակարգի վրա։
Երեկ` դեկտեմբերի 21-ին, Երևան քաղաքի ընդհանուր իրավասության դատարանը որոշեց ազատ արձակել գեներալ Մանվել Գրիգորյանին։ Նրան ազատ արձակեցին 25 մլն դրամ գրավի դիմաց։
Հիշեցնենք` ԱԱԾ-ն հունիսի 17-ին տեսանյութ էր հրապարակել` ներկայացնելով ՀՀ Արմավիրի մարզի Արշալույս գյուղի Լճափնյա փողոցում գտնվող, Մանվել Գրիգորյանին սեփականության իրավունքով պատկանող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Մանվել Գրիգորյանը մեղադրվում է ապօրինի կերպով ռազմամթերք ձեռք բերելու և պահելու, ինչպես նաև առանձնապես խոշոր չափերով գույք հափշտակելու մեջ։ Դատարանը երեք անգամ երկարաձգել էր նրա կալանքի ժամկետը:
