ԵՐԵՎԱՆ, 31 դեկտեմբերի — Sputnik. 2019 թվականի փետրվարի 1-ից Հայաստանում էլեկտրաէներգիայի գինն անապահով ընտանիքների համար կնվազեցնեն 10 դրամով։ Հանրային ծառայությունները կարգավորող հանձնաժողովը մանրամասն պարզաբանել է՝ ինչպես է հաջողվել դրա համար գումար գտնել։
Մեծ մասամբ օգնել է ատոմակայանի վերանորոգումը։ Այս տարվա ընթացքում այնտեղ ռուսական գեներատոր են տեղադրել, հաջորդ տարի երկրորդը կտեղադրեն։ Նոր ու արդյունավետ գեներատորները թույլ կտան ավելի շատ էլեկտրաէներգիա ստանալ։
Դրա շնորհիվ արդեն 2019 սակագնային տարում (որը սկսվում է փետրվարի 1-ից) կայանն ավելի քան 10%-ով շատ էլեկտրաէներգիա կարտադրի։ Հիմա ատոմակայանի արտադրած էլեկտրաէներգիան ամենաէժանն է Հայաստանում։
Եկող տարի կսկսեն վճարել վերանորոգման համար վերցրած վարկը (նույնպես ռուսական), բայց կողմերն այնպես են կազմել վճարումների ժամանակացույցը, որ գինը բեռ չդառնա Հայաստանի բնակիչների ուսերին։ Կայանում ավելի քան մեկ տարվա վառելիք է արդեն հավաքվել։
Ավելի քիչ էլեկտրաէներգիա կարտադրեն ջերմային կայանները։ Վերջին տարիներին մեր երկրում ավելի քիչ էլեկտրականություն է սպառվում։ Առաջին հերթին կրճատում են ջերմային կայանների բեռնվածությունը, քանի որ դրանց արտադրած էլեկտրաէներգիան ավելի թանկ է։
ՀԾԿՀ-ի հաշվարկով (վերջին չորս տարիների միտումների հիման վրա)՝ 2019-ին էլեկտրաէներգիայի սպառումը կկրճատվի ևս 6%-ով։ Այդ պատճառով էլ Հրազդանի ՋԷԿ-ում ու դրա հինգերորդ էներգաբլոկում արտադրությունը զգալի կկրճատվի։ Այդ երկու կայանները, որոնց արտադրած էլեկտրաէներգիան ամենաթանկն է, վերջին հերթին են միանում։
Կլիմայական պայմանների պատճառով (գարնանային վարարումների նվազում) արտադրության փոքր (3%-ից մի փոքր շատ) կրճատումներ կլինեն ՀԷԿ-երի Սևան-Հրազդանի ու Որոտանի կասկադներում։ ՀԷԿ-երում ու ՋԷԿ-ում կրճատումները ձեռնտու չեն համակարգին, բայց ատոմակայանի դրական արդյունքն ավելի մեծ կլինի։
Եվս մեկ կարևոր գործոն է այն, որ ռուսական «Տաշիր գրուպը» (որը կառավարում է «Հայաստանի էլեկտրացանցերը») որոշել է նվազեցնել իր եկամուտը (14%-ից 12% դրամային ներդրումների, 12-ից 10% արտարժույթով ներդրումների համար)։
«Էլցանցերը» սակագնի մեջ ներառում է նաև վերանորոգման աշխատանքների ներդրումները, որոնք պետք է արդարացնեն իրենց։ Բայց ինչպես արդեն գրել էինք, «Տաշիրը» համաձայնել է ներդրումների գումարները հետ բերել մոտ տասը տարում։ Այդ պատճառով վերանորոգման աշխատանքների հետևանքով լույսի գինը զգալի չի աճի։
Վերջում հիշեցնենք՝ ով ու ինչքան է Հայաստանում վճարում էլեկտրականության համար։
0,38 կՎտ լարվածության էլեկտրաէներգիա սպառող բաժանորդները (այդ թվում՝ բնակչությունը) ցերեկը մեկ կիլովատտ-ժամի դիմաց վճարում են 44,98 դրամ, գիշերը` 34,98 դրամ՝ ։
6 (10) կՎտ–ի բաժանորդները` 41,98 ու 31,98 դրամ համապատասխանաբար։ 35 կՎտ–ի դեպքում` 35,98 ու 31,98 համապատասխանաբար, 110 կՎտ–ի դեպքում (խոշոր արդյունաբերական ձեռնարկությունները) 33,48 ու 29,48 դրամ համապատասխանաբար։
Իսկ սոցիալապես անապահով ընտանիքները (105 հազար բաժանորդ) ցերեկը դեռ վճարում են 40 դրամ, գիշերը` 30 դրամ։ Փետրվարի մեկին նրանք կսկսեն վճարել 29,9 ու 19,9 դրամ համապատասխանաբար։
