ԵՐԵՎԱՆ, 8 հունվարի — Sputnik. Վերջին 4 տարվա ընթացքում ՀՀ զինված ուժերը համալրվել են 2000–ից ավելի նոր ավտոմեքենաներով։ Այսօր՝ հունվարի 8–ին, ՀՀ ՊՆ կենտրոնական հավաքակայանում, լրագրողների հետ ճեպազրույցում այս մասին ասաց ՀՀ ԶՈՒ գլխավոր շտաբի պետ Արտակ Դավթյանը` անդրադառնալով վերջին շրջանում զինվորական ավտոմեքենաների վթարներին:
«Դրան զուգընթաց հանվում են այն բոլոր ավտոմեքենաները, որոնք իրենց դարն ապրել են տարիքի կամ անսարքության պատճառով։ Մոտ ժամանակներում ևս գործընթացը շարունակվելու է»,– ասաց նա։
Իսկ ինչ վերաբերում է վթարներին, Դավթյանը նշեց, որ նման բան որևէ մեկը բացառել չի կարող, թեև բոլոր ավտոմեքենաները պարբերաբար ստուգվում են, իսկ անհրաժեշտության դեպքում` նորոգվում կամ փոխարինվում նորով։
«Ցավալի դեպքը, որ մենք ունեցանք, դրանից հետո ավելի խստացվեց վերահսկողությունը»,– ասաց Դավթյանը։
Հիշեցնենք` նոյեմբերի 7-ին Սյունիքի մարզի Որոտան-Խնձորեսկ ավտոճանապարհին տեղի ունեցած ավտովթարի հետևանքով Զանգեզուրի կայազորի զինվորական հոսպիտալ էին տեղափոխել ավելի քան 2 տասնյակ զինծառայողներ։
Նրանցից 6–ը ստացել էին տարբեր աստիճանի կոտրվածքներ, 4-ը մահացել էին։
