ԵՐԵՎԱՆ, 15 փետրվարի — Sputnik. Հայաստանի ջրային համակարգի վրա ներկա պահին 10.5 մլրդ դրամի պարտք կա։ Այսօր կառավարության նիստում հայտարարեց վարչապետ Նիկոլ Փաշինյանը։
«Մենք պետք է զբաղվենք` հասկանալու համար, թե այդ պարտքն ինչպես է գոյացել։ Քիչ հավանական է, որ գյուղացին իր օգտագործած ջրի դիմաց չի վճարել, և մենք լուրջ կասկած ունենք, որ գործ ունենք կոռուպցիոն սխեմաների հետ»,– ասաց Փաշինյանը։
Վարչապետը նշեց, որ այս խնդրի ուսումնասիրությունը հանձնարարվել է Պետական վերահսկողական ծառայությանը։ Ծառայության պետ Դավիթ Սանասարյանն էլ հայտնեց, որ վարչապետի հանձնարարականի կատարման վերջնաժամկետը մարտի 15-ն է։ Ժամկետի ավարտին ուսումնասիրությունը կներկայացվի մանրամասն, բայց մինչ այդ էլ Դավիթ Սանասարյանը որոշ տեղեկություններ հայտնեց։
«Այդ պարտքի զգալի հատվածը ձևավորվել է այսպես. գյուղացին վճարում է իր օգտագործած ջրի դիմաց։ Բայց այդ վճարածը տեղ չի հասնում, և վերջում գրում են կորուստի կամ այլ բաների վրա»,– ասաց Սանասարյանը։
Նիկոլ Փաշինյանը հարցի վրա հրավիրեց նիստին ներկա քննչական մարմինների ղեկավարների և ՀՀ գլխավոր դատախազի ուշադրությունը։
Միաժամանակ վարչապետը հետաքրքրվեց, թե ինչքանով է Հայաստանը պատրաստ ոռոգման սեզոնին։ ԱԻ նախարար Ֆելիքս Ցոլակյանը հայտնեց, որ ներկա պահին հայաստանյան բոլոր ջրամբարներն անհրաժեշտ քանակով լցված են, բացի Սևանից։
Նախարարը, սակայն հույս հայտնեց, որ տեղումների շնորհիվ մինչ սեզոնի մեկնարկը պակասը կլրացվի։
