ԵՐԵՎԱՆ, 18 փետրվարի — Sputnik Արմենուհի Մխոյան. Ամենամյա «Սլավյանսկի բազար-2019» միջազգային մրցույթ-փառատոնում այս տարի Հայաստանը կներկայացնի գյումրեցի 23- ամյա Մոնիկան Մանուչարովան։ Մրցույթը կկայանա հուլիսի 8-ից 18-ը Բելառուսի Վիտեբսկ քաղաքում, իսկ մինչ այդ, մոտ 5 ամիս նախապատրաստական ընթացքն է:
Երիտասարդ երգչուհին դեռ չի որոշել, թե ինչ երգով կներկայանա հանդիսատեսին։ Մոնիկան Sputnik Արմենիայի հետ զրույցում նշեց, որ ուզում են մի լավ մտածել, մինչև երգերի ընտրությունը։
«Նոր երգեր չեն լինելու: Տվյալ պահին երգերի փնտրտուքների մեջ ենք։ Ուզում ենք, որ երգը մրցութային լինի, բոլորին ծանոթ և համապատասխանի ձայնային դիապազոնին՝ այս ամենը մեկում: Երկու երգ ենք ընտրելու, բայց դրանց զուգահեռ մի երկու երգ էլ լրացուցիչ կնախատեսենք՝ համերգների կամ այլ հանդիպումների համար»,-նշեց երգչուհին:
Մրցույթը բաղկացած է լինելու 2 փուլից՝ միջազգային հիթ և սլավոնական երգ:
Ամենամյա «Սլավյանսկի բազար» միջազգային մրցույթի մասնակիցն ընտրվել է Հայաստանյան ազգային նախընտրական փուլի եզրափակչի ընթացքում:
Խոսելով իր ընտրության մասին Մոնիկան անկեղծանում է՝ չէր սպասում: Նա շնորհակալություն է հայտնում այն մարդկանց, ովքեր իր կողքին են եղել`Արամ Ավետիսյանին՝ ձայնագրման «Հորիզոն» ստուդիայի ղեկավարին և Արմեն Ձամուկաշվիլիին՝ երաժիշտ, գործիքավորողին:
Մոնիկան խոստանում է՝ այս տարի էլ բարձր պահել նախկին տարիներին մրցույթի հայ մասնակիցների նշաձողը: «Յուրաքանչյուր մասնակից դրա մասին շատ է մտածում, դրա համար էլ ավելի քան 5 ամիս քրտնաջան աշխատանք է սպասվում: Հուսով եմ՝ արդարացնելու եմ բոլորի սպասելիքները: Ես պատրաստ գնում եմ հաղթանակած հետ գալու, բայց եթե չստացվի ամենաբարձր հորզոնականները գրավել, կարևորը Հայաստանի անունը բարձր պահելն է»,-նշում է երգչուհին` հավելելով՝ 2019 թվականը իր տարին է, կենդանակերպի իր նշանը հաջողություն կբերի իրեն:
Երգուչուհու համար սա առաջին նմանատիպ բեմելը չէ։ Մոնիկա Մանուչարովան 2008 թվականին Հայաստանը ներկայացրել է Մանկական Եվրատեսիլում, 2018-ին արդեն մեծահասակների Եվրատեսիլում Սևակ Խանաղյանի բեկվոկալում էր։ Լինելով «Գոհար» երգչախմբի երգչուհի`մի շարք համերգների է մասնակցել, երգել է նաև Ռոբերտ Մլքեյանի «Տիրամայր Հայաստան» երգչախմբում: Այս ամենը փորձ է, որը կնպաստի իր ելույթին:
«Գյումրեցու բնավորությունը կօգնի, առաջին անգամ չէ։ Ես միշտ ինչ-որ մրցույթի մասնակցելիս նախընտրել եմ, որ նշեն Հայաստան, քաղաք Գյումրի: Գյումրին իմ թալիսմանն է իմ ամեն մի գործի ու մրցույթի ընթացքում: Ամեն համերգից հետո ես շնորհակալություն եմ հայտնում Աստծուն՝ ինձ տրված հնարավորության ու այն մարդկանց գոյության համար, ովքեր իմ կողքին են։ Եվ առաջին հերթին իմ մայրիկին, ում շնորհիվ ես այսօր ամեն ինչ ունեն: Մայրիկս այն մարդկանցից է, ով ինձ միշտ մեծ էներգիա է տալիս, բայց ցավոք, հյուրախաղերին միշտ չէ, որ կողքիս է»,-ասում է Մոնիկան ու նշում, որ անգամ իր բեմական տեսքն իր ու մայրիկի համատեղ որոշումն է:
Վերջում երգչուհին անկեղծանում է՝ ունի ընտրած էակ, պատրաստ է ընտանիք կազմել, բայց ոչ հիմա, ոչ մոտակա 2 տարիների ընթացքում:
Մոնիկա Մանուչարովան ծնվել է 1995 թվականին Գյումրիում, ավարտել է Գյումրու Արմեն Տիգրանյանի անվան երաժշտական դպրոցը: 2017 թվականին ավարտել է Երևանի Կոմիտասի անվան կոնսերվատորիայի ջազ էստրադային վոկալ բաժինը: 17 տարեկանից «Գոհար» սիմֆոնիկ նվագախմբի և երգչախմբի կազմում տարբեր երկրներում է եղել: 13 տարի երգել է նաև Մաեստրո Ռոբերտ Մլքեյանի «Տիրամայր Հայաստան» երգչախմբում:
Արդեն երեք տարի է, ինչ «Սլավյանսկի բազար» միջազգային մրցույթում Հայաստանը ներկայացնող մասնակիցներին ընտրում է Երևանի մշակույթի պետական քոլեջը՝ աջակցությամբ «MGER ARMENIA» փրոդաքշնի: 2019 թվականից թիմին միացել է նաև Հայաստանի պետական ֆիլարմոնիան:
Ի դեպ, «Սլավյանսկի բազար» մանկական կատարողների մրցույթում Հայաստանը կներկայացնի 10-ամյա Անժելա Ալբերտյանը:
