ԵՐԵՎԱՆ, 14 մարտի — Sputnik. Marvel ընկերությունն իր հայտնի ֆիլմաշարի` «Վրիժառուների» նոր թրեյլերն այսօր` մարտի 14-ին, հրապարակել է YouTube-ի իր պաշտոնական ալիքում։ Թրեյլերում դրվագներ կան ընկերության ստեղծած կինոտիեզերքի նախորդ ֆիլմերից («Երկաթե մարդ», «Կապիտան Ամերիկա» և «Անվերջության պատերազմ») ։
Տեսահոլովակում նորություններ գրեթե չկան։ Աչքի է ընկնում «Վրիժառուներ» կոչվող սուպերհերոսների խմբավորման նոր համազգեստը և վերջապես Կապիտան Մարվելի երկար սպասված միավորումը «Վրիժառուներին» ։
Հիշեցնենք, որ ֆիլմի նախորդ էպիզոդում սուպերհերոսներից շատերը դարձել էին իրեն աստվածացնող Տանոսի ստեղծած քաոսի զոհերը, և այս նոր համալրումը հաստատ չի խանգարի Marvel–ի սուպերհերոսներին։
Թրեյլերը մի քանի ժամվա ընթացքում արդեն դիտել են ավելի քան 400 հազար անգամ։
«Վրիժառուներ. խաղի վերջ» ֆիլմը մեծ էկրաններին է հայտնվելու ապրիլի 29–ից։ Մնում է հուսալ, որ հայկական կինոթատրոններում պրեմիերան չի ուշանա։
Հիշեցնենք, որ Marvel–ն իր կինոտիեզերքը ստեղծել է 2008 թվականին` «Երկաթե մարդը» ֆիլմով։
