ԵՐԵՎԱՆ, 19 մարտի – Sputnik. Հայաստանի վարչապետ Նիկոլ Փաշինյանը այսօր կայացած մամուլի ասուլիսի ընթացքում փորձեց հանգստացնել հանրությանը` ցույց տալով, որ ամեն ինչ վերահսկվում է։ Sputnik Արմենիայի հետ զրույցում նման կարծիք հայտնեց քաղտեխնոլոգ Վիգեն Հակոբյանը։
Գլոբալ առումով մամուլի ասուլիսի ընթացքում որևէ նոր գաղափար չհնչեց, կարծում է փորձագետը։ Հիմնականում վարչապետը մանրամասնեց որոշ հարցեր, օրինակ, մեկնաբանեց լուրերը կնոջ մասին, պարզաբանեց այն փաստը, որ Արմեն Սարգսյանի հրավերը Անվտանգության խորհրդի Ստեփանակերտում կայացած նիստին ուշացել է։
Միաժամանակ նա չի հերքել, որ նրա ու նախագահի հարաբերությունները բավականին սառն են։
«Ինձ համար միակ նորությունն այն էր, որ Փաշինյանը ակտիվորեն հետևում է փորձագետների ու վերլուծաբանների հայտարարություններին։ Այնպիսի տպավորություն էր ստեղծվում, որ որոշումներ կայացնելիս նա խորհրդակցում է միայն իր մտերիմների հետ», – ասաց Հակոբյանը։
Ելույթից հասկանալի դարձավ, որ ամենայն հավանականությամբ վարչապետն իր համար սահմանել է լրագրողների ու փորձագետների մի շրջան, որոնց վստահում է։
Ասուլիսի ընթացքում Փաշինյանը փորձեց հանգստացնել հանրությանը, ցույց տալով, որ ամեն ինչ հսկողության տակ է։ Վարչապետի խոսքով` աշխատանքն առաջ է գնում, թեև՝ երբեմն դանդաղ։
Միակ ձախողումը, որի մասին հիշատակել է Փաշինյանը, Հակոբյանի խոսքով, կարող է կապված լինել Վերահսկողության ծառայության հետ։
Թեև դժվար է հստակ խոսել, քանի որ «ձախողման» չափանիշները, որոնք կիրառում է վարչապետը, այդքան էլ հասկանելի չեն։ Քաղտեխնոլոգը համամիտ չէ, որ կառավարության կամ ընդհանուր առմամբ իշխանության քաղաքականության մեջ ակնհայտ ձախողումներ չկան։
«Կարծում եմ` կան բազում ոլորտներ կամ պաշտոնյա անձինք, որոնք ձախողել են», – ասաց Հակոբյանը։
Նրա կարծիքով` որոշակի ճգնաժամ է առաջացել որոշումների կայացման, մեթոդաբանության բացակայության հետ կապված։ Օրինակ, հանրությանը ներկայացրված մի շարք նախագծեր հետ են կանչվում` բացասական արձագանքի արժանանալով։
Ինչ վերաբերում է այլ ուղերձներին` ապա հետաքրքրական են Փաշինյանի խոսքերն այն մասին, որ արտակարգ իրավիճակում նա պատրաստ է հանդիպել երեք նախկին նախագահների հետ, եթե դա պայմանավորված լինի ազգային շահերի նկատառումներից։
Արցախի բանակցային գործընթացի վերաբերյալ վարչապետը նոր մտքեր չհնչեցրեց, փոխարենն անդրադարձավ Արցախում տիրող իրավիճակին։
Փաշինյանն ակնարկեց, որ Արցախում առաջիկա ընտրությունների հարցում նա հնարավորինս զգույշ է լինելու, հաշվի է նստելու տեղական վերնախավի տրամադրվածության ու հասարակական տրամադրությունների հետ, հաշվի առնելով որոշ քաղաքական ավանդույթներ, որոնք տարբեր են բուն Հայաստանի քաղաքական ավանդույթներից։
«Ասածի ենթատեքստը այսօրվա ռազմաքաղաքական վերնախավի հետ պայմանավորվածությունն է, որ ընտրությունները կանցնեն բարձր ժողովրդավարական ստանդարտների համաձայն», – ասաց Հակոբյանը։
Հայաստանի վարչապետի մամուլի ասուլիսը տեղի ունեցավ Մատենադարանում։ Այն ռեկորդային էր ու տևեց 4 ժամ 15 րոպե։
