ԵՐԵՎԱՆ, 28 մարտի — Sputnik. Հայաստանում IDeA հիմնադրամը գործարկեց Climate Uturn բնապահպանական հարթակը։ Այս մասին Sputnik Արմենիայի հետ զրույցում ասաց հարթակի ղեկավար Դիանա Բադեյանը։
Նրա խոսքով` Climate Uturn բնապահպանական հարթակ է, որի առաջնահերթություններն են անտառային ֆոնդի վերականգնումը, էներգիայի խնայողությունը, թափոնների առաջացման կանխարգելումը, էկոլոգիական չափանիշների ձևավորումը: Նա կարծում է, որ հիմա բնապահպանական մարտահրավերները ներառված չեն տեղեկատվական օրակարգում։
«Արդյունքում մարդիկ մնում են վատ կրթված, փաստերին չվստահող, չեն հավատում, որ իրենց գործողությունները կարող են նշանակություն ունենալ։ Միաժամանակ թափոնների թվի կրճատման հարցում ամենակարճ ճանապարհը վարքի մոդելի փոփոխումն է։ Ներդնելով «կանաչ» սովորություններ՝ մենք պլանավորում ենք մարդկանց ներգրավել խմբային գործողությունների կայուն մոդելներում, որոնք կարող են դրական ազդել շրջակա միջավայրի վրա», – նշեց նա։
Բադեյանը համոզված է, որ շարժիչ ուժը կամավորներն են, քանի որ փոքր քանակի գործողությունները, երբ իրականացվում են մեծ քանակի մարդկանց կողմից, կարող են փոխել իրավիճակը։ Հենց այդ տրամաբանությամբ է կազմակերպվելու օնլայն ու օֆլայն ակտիվությունների շարքը։ Այդ թվում` չելենջներ, ֆլեշմոբներ, ակցիաներ և այլն։ Սակայն խոշոր միջոցառումները նախատեսվում են աշնանն անցկացնել։
«Մենք նախատեսում ենք աշխատել կամավորների հետ դպրոցներում, համալսարաններում, գրասենյակներին ու աշխատատեղերում։ Արդեն բանակցություններ ենք վարում միջազգային ու տեղացի գործընկերների հետ։ Մենք խորապես համոզված ենք, որ միայն միացյալ ջանքերը, ռեսուրսներն ու կոմպետենցիան մեկտեղելով է հնարավոր ստեղծել հաջողակ ու կայուն նախագիծ», – ընդգծեց հարթակի ղեկավարը։
Հիշեցնենք` ավելի վաղ «Հայաստանի զարգացման նախաձեռնություններ» (IDeA) հիմնադրամի կամավորների մի խումբ նախաձեռնել էր World Cleanup Day Հայաստանը։
Շարժմանն արդեն միացել են 150 երկիր։ 15-ը Համաշխարհային մաքրության օր էր հայտարարված։ Այդ օրը Հայաստանում մոտ 10 հազար կամավոր միավորվել էին մեկ նպատակի շուրջ` մաքրել աղբից իրենց երկրի տարածքը։ Ընդհանուր առմամբ կամավորները մաքրել էին հանրապետության 300 գոտի, այդ թվում` այգիներ, փողոցներ, բակեր, հուշարձաններին կից տարածքներ։
