Ազգային ժողովի տնտեսական հարցերի մշտական հանձնաժողովում քննարկվում է ներկրվող ցեմենտի մաքսատուրքը բարձրացնելու կառավարության առաջարկը, որի նպատակը Հայաստանում արտադրվող ցեմենտի մրցունակությունն ապահովելն է:
Ըստ տնտեսական զարգացման ու ներդրումների նախարար Տիգրան Խաչատրյանի, մաքսատուրքի ավելացումը նպատակ ունի պաշտպանել տեղական արտադրողներին։ Արդյունքում «Արարատցեմենտ» գործարանի տնօրինությունը որոշել է կրճատել աշխատողների թիվը, ինչն էլ բողոքի ակցիայի պատճառ է դարձել։
Sputnik Արմենիայի հետ զրույցում թեմային անդրադարձել է տնտեսագետ Վահագն Խաչատրյանը։ Նրա խոսքով, Հայաստանի տնտեսության զարգացման մոդելի ակունքներում միշտ եղել է տեղական արտադրողին խթանելու մասին պոպուլիստական հայտարարությունը, որը հանրությանը սխալ է ներկայացվել։
«Հարկադրույքներն ու մաքսատուրքերը ավելացնելով տեղական արտադրողին ավելի մեծ մրցակցային առավելություն ապահովելը միշտ իր մեջ վտանգ է պարունակել, ինչի հետևանքով տուժել ենք սպառողներս»,- փաստում է տնտեսագետ Վահագն Խաչատրյանը։
Վահագն Խաչատրյանը սխալ է համարում, որ բոլոր տնտեսվարողները մրցակցային առավելություն ստանալու համար դիմեն կառավարությանը. նա կիսում է վարչապետ Փաշինյանի այն տեսակետը, որ նման դեպքերը պետք է բացառիկ լինեն։
«Բոլոր արտադրողները պետք է հասկանան, որ նոր տեխնոլոգիաների ներդրումը հնարավորություն կտա իրենց օգտագործել մրցակցային առավելությունը»,-հուշում է տնտեսագետը։
Ըստ Վահագն Խաչատրյանի, կառավարության օգնությունը տնտեսվարողին պետք է հիմնավորված լինի։
