ԵՐԵՎԱՆ, 23 ապրիլի – Sputnik. ԱԺ–ն այսօր` ապրիլի 23-ին, առաջին ընթերցմամբ ընդունեց ԱԺ փոխնախագահներ Լենա Նազարյանի և Ալեն Սիմոնյանի հեղինակած «2008 թվականի մարտի 1-ից 2-ը Երևան քաղաքում տեղի ունեցած իրադարձությունների ժամանակ տուժած անձանց աջակցության մասին» օրենքի նախագիծը:
Դրանով առաջարկվում է աջակցություն տրամադրվել 2018թ-ի մարտի 1-2-ի գործողությունների ժամանակ վնասվածք ստացած և զոհված անձանց ու նրանց ընտանիքներին:
Նախագծի հեղինակների համոզմամբ` նախկին իշխանության օրոք ոչ բոլոր տուժածներն են ընկալվել որպես տուժած:
«Մարտի 1-ը ցավ է մեր ժողովրդի համար: ԲՀԿ-ն բազմաթիվ անգամ հրապարակային ելույթներով պահանջել է, որ մարտի 1-ի բոլոր հանգամանքները բացահայտվեն, բոլոր մեղավորները պատժվեն: Եվս մեկ անգամ ևս կարևորելով մարտի 1-ի ոճրագործությունների բացահայտման անհրաժեշտությունը` ԲՀԿ-ն կողմ է քվեարկում առաջարկված նախագծին»,- նախագծի քվեարկությունից առաջ հայտարարեց «Բարգավաճ Հայաստան» խմբակցության ղեկավար Վահե Էնֆիաջյանը:
Նախագիծն ընդունվեց միաձայն` առանց դեմ ու ձեռնպահ ձայների: Օրինագծի երկրորդ ընթերցումը տեղի կունենա արդեն ԱԺ հաջորդ քառօրյա նիստերի ընթացքում:
Հիշեցնենք` 2008 թվականի փետրվարի 24-ին Հայաստանի ԿԸՀ-ն հայտարարել էր, որ ընտրություններում հաղթել է Սերժ Սարգսյանը։ Բողոքի ակցիայի մասնակիցները պահանջում էին վերահաշվարկել քվեները։
Մարտի 1-ի գիշերը Ազատության հրապարակում ոստիկանական ուժերը օպերատիվ-հետախուզական գործողություններ էին իրականացրել «տեղանքը ստուգելու» համար, որի արդյունքում հազարավոր ցուցարարների հեռացրել էին հրապարակից։
Մարտի 1-ի երեկոյան ԶՈՒ և ոստիկանության ստորաբաժանումները Երևանի կենտրոնական փողոցներում զենքի, պայթուցիկ սարքերի և հատուկ միջոցների օգնությամբ ցուցարարներին ցրելու համար հատուկ գործողություններ էին իրականացրել։ Արդյունքում հարյուրավոր մարդիկ վնասվածքներ էին ստացել, մահացել էին 8 քաղաքացիական անձ և 2 ոստիկան։
