ԵՐԵՎԱՆ, 24 ապրիլի — Sputnik. Հայոց ցեղասպանության նկատմամբ վերաբերմունքով աշխարհի երկրները բաժանվում են երեք խմբի։ Այսօր Ծիծեռնակաբերդի հուշահամալիրում լրագրողներին ասել է «Հանրապետություն» կուսակցության նախագահ Արամ Սարգսյանը։
«Առաջինը այն երկրներն են, որոնք անկեղծ են իրենց պատմության, խղճի, աշխարհի առաջ։ Դրա փայլուն օրինակը Ֆրանսիայի հանրապետությունն է, որը Ցեղասպանությունը ճանաչել է` անկախ ամեն ինչից։ Երկրորդ խմբի երկրներն այն երկրներն են, որոնք Ցեղասպանությանն անդրադառնում եմ այն դեպքերում, երբ ինչ–ինչ խնդիրներ են ունենում Թուրքիայի հետ։ Այդ ժամանակ իրեն սենատներում, սեյմերում շահարկելու համար հայտնվում է Ցեղասպանության հարցը։ Դրա բացառիկ օրինակը Իսրայելն է։ Մյուս երկրներն այն երկրներն են, որոնց հայկական համայնքը շատ մեծ է։ Ու իրենց ընտրություններից առաջ որոշ թեկնածուներ խոստանում են ճանաչել Հայոց ցեղասպանությունը, ընտրություններից հետո էլ մոռանում են կամ ցեղասպանություն բառը հայերեն են արտասանում։ Դրա փայլուն օրինակն էլ ԱՄՆ–ն է»,– ասաց Սարգսյանը։
Աշխարհի նման կառուցվածքի պայմաններում Հայաստանի ձայնը լսելի դարձնելու միակ տարբերակն, ըստ Արամ Սարգսյանի, ուժեղ պետություն ստեղծելն է։
«Պետք է մեր միջից իսկապես հանվի զոհի հոգեբանությունը։ Մենք պիտի ուժեղ դառնանք, որպեսզի թույլ չտանք մեզ հետ այդպես վարվել։ Հակառակ դեպքում, դատապարտենք, չդատապարտենք, ինչքան ասենք` հիշում ու պահանջում ենք, դրանից բան չի փոխվելու»,– ասաց նա։
Թուրքիայի հետ առանց նախապայմանների դիվանագիտական հարաբերություններ հաստատելու Նիկոլ Փաշինյանի դիրքորոշումը Արամ Սարգսյանը ողջունում է` միաժամանակ քննադատելով այս հարցում Թուրքիայի պահվածքը։
