ԵՐԵՎԱՆ, 2 մայիսի — Sputnik. Հայաստանում բռնադատվածի կարգավիճակ ունեցող անձանց սոցիալական վիճակը բարելավելու համար ՀՀ կառավարությունը որոշում է կայացրել ներել 17 տարի առաջ նրանց տրամադրված վարկերի նկատմամբ ունեցած պարտավորությունները։
Առաջարկը կառավարությանն արվել է աշխատանքի և սոցիալական հարցերի նախարարության կողմից։
Ըստ գործադրի նիստի օրակարգ ներառված նախագծի`խոսքը խորհրդային ժամանակներում բռնադատվածներին ու նրանց ժառանգներին 2002 թվականին պետական բյուջեից արտոնյալ պայմաններով տրված երկարաժամկետ վարկերի մասին է, որոնք հատկացվել էին բնակարանային պայմանների ապահովման նպատակով։
Այս որոշմամբ 17 տարի առաջ 303 քաղաքացի 25 տարի մարման ժամկետով 1 տոկոս տոկոսադրույքով ընդհանուր առմամբ 1 272 094 607 դրամի վարկ էր ստացել։
Ավելի ուշ, հաշվի առնելով բռնադատվածների սոցիալական ծանր վիճակն ու վարկը մարելու դժվարությունները, կառավարությունը երկու անգամ` 2010 և 2013թթ. –ին վարկերի մարման ժամկետները երկարաձգելու որոշումներ էր կայացրել։
Բայց 2018թ.–ի դրությամբ պարզվել է, որ վարկն ամբողջությամբ մարել են միայն 19 վարկառու, իսկ 114-ը ոչ մի վճարում չի կատարվել։
Արդյունքում, 2018 թ.–ի սեպտեմբերի դրությամբ բռնադատված անձանց չմարված վարկային պարտավորությունների ամբողջ գումարը կազմում է 343 138 920 դրամ, որից 230 130 276–ը վարկի մայր գումարներն են, 36 662 626 –ը՝ տոկոսագումարները, իսկ 76 346 018–ը` տույժերը:
Հաշվի առնելով, որ վարկառուների հիմնական մասը տարեց և սոցիալապես անապահով անձինք են և հնարավորություն չունեն կատարելու իրենց վարկային պարտավորությունները, ՀՀ կառավարությունն այսօր որոշեց ներել վարկային ամբողջ պարտքը` ազատելով նրանց վարկային պարտավորություններից ու տարիների ընթացքում ավելացած տույժերի վճարումից:
Գործադիրն իր որոշումը հիմնավորում է 280 վարկառուների սոցիալական վիճակը բարելավելու մտադրությամբ։
