ԵՐԵՎԱՆ, 2 մայիսի – Sputnik. ՀՀ ազգային ժողովի պատգամավոր, «Բարգավաճ Հայաստան» կուսակցության նախագահ Գագիկ Ծառուկյանը համոզված է, որ իրեն պատգամավորական մանդատից զրկելու հիմքեր չկան։ Նա այս մասին ասաց այսօր լրագրողների հետ զրույցում։
Լրագրողները հարցրին Ծառուկյանից` հնարավո՞ր համարում եք, որ ձեզ մանդատից զրկելու գործընթաց սկսվի։
«Ուրեմն տակը բան պիտի լինի, որ հնարավոր լինի։ Քանի որ բողոքը տրվել ա, պարտավոր են բողոքին ընթացք տալ, լսել և ըստ սահմանադրության որոշում ընդունել»,– ասաց Ծառուկյանը։
Հիշեցնենք` «Քաղաքացու որոշում» կուսակցության գործադիր մարմնի քարտուղար Սուրեն Սահակյանը դիմում է հղել ՀՀ ԱԺ նախագահ Արարատ Միրզոյանին՝ խնդրելով ԲՀԿ խմբակցության ղեկավար, պատգամավոր Գագիկ Ծառուկյանի լիազորությունները դադարեցնելու հարցով դիմել Սահմանադրական դատարան։
Սահակյանը դիմել է նաև ՀՀ գլխավոր դատախազ Արթուր Դավթյանին՝ ՀՀ ԱԺ պատգամավոր Գագիկ Ծառուկյանի նկատմամբ հարուցել քրեական հետապնդում՝ հիմք ընդունելով ՀՀ Սահմանադրության 98-րդ հոդվածի 2-րդ մասը՝ պատգամավորի լիազորությունների դադարեցումը ՀՀ Սահմանադրության 95-րդ հոդվածի պահանջները խախտելու դեպքերում: Սուրեն Սահակյանն իր պահանջը հիմնավորում է Գագիկ Ծառուկյանի վերջին մի քանի հարցազրույցներում հնչեցրած հայտարարություններով։ Խոսքը վերաբերում է ապօրինի ձեռնարկատիրական գործունեությամբ զբաղվելու կասկածին, ինչի հաստատման դեպքում նշված պատգամավորի լիազորությունները, ըստ Սահակյանի, պետք է դադարեցվեն: «Հայաստանի Հանրապետությունում բիզնեսը պետական կառավարման համակարգից պետք է տարանջատված լինի և վերջ»,- նշվում է «Քաղաքացու որոշում» կուսակցության տարածած հայտարարության մեջ։
«Քաղաքացու որոշում» կուսակցության հաղորդումն ուղարկվել է Հատուկ քննչական ծառայություն։
