Շնորհավոր մեր տոնը, սիրելի գործընկերներ:
Այո, այսօր Մամուլի ազատության համաշխարհային օրն է, որ հռչակվել է ՄԱԿ-ի Գլխավոր ասամբլեայի կողմից 1993 թվականին: Այն, որոշակի իմաստով, լրագրողների մասնագիտական տոն է համարվում:
«Ինֆորմացիայի ազատության կենտրոնի» ղեկավարը՝ Հայաստանի մեդիադաշտի ազատության մասին
Բավականին հետաքրքիր է հնչում, մանավանդ նախորդ նշումից հետո, բայց մայիսի 3-ը նաև որպես «Լռության օր» է նշվում ԱՄՆ-ում ու Եվրոպայի մի շարք երկրներում: Դա հիմնականում ուսանողների ընդգրկմամբ ակցիաներով է նշանավորվում, որոնց մասնակիցները լռելյայն բողոքում են խտրականության ամենատարբեր դրսևորումներից ու պայքարում դրանց դեմ:
Ամփոփելով այս մասը, հավելենք, որ մայիսի 3-ը նաև որպես Արեգակի օր է նշվում:
Ինչ վերաբերում է հայտնի անձանց, ապա 1962 թվականի մայիսի 3-ին է ծնվել թատրոնի և կինոյի դերասան, բեմադրիչ, դրամատուրգ Սլավա Ստեփանյանը:
Նոր ժամանակներում ամենից տպավորված ռուս դերասան Դմիտրի Կոզլովսկին, որ արդեն ՌԴ վաստակավոր արտիստի կոչում ունի ու մի շարք կինոմրցանակների դափնեկիր է, նույնպես ծնվել է այս օրը՝ 1985թ. մայիսի 3-ին:
Նմանապես, մայիսի 3-ին է ծնվել Նիկոդիմոս Եսայի Ամատունի իշխանը (1865-1946), որ եղել է Ռուսական կայսրության 4-րդ դասի պաշտոնյա, իսկական պետական խորհրդական, հասարակական գործիչ:
Իսկ ահա նշանավոր հայագետ, լեզվաբան, ակադեմիկոս Գրիգոր Ղափանցյանը (1887-1957) մահացել է մայիսի 3-ին:
Մայիսի 3-ին է մահացել նաև հնդկական կինոյի դերասանուհի Նարգիսը՝ Ֆաթիմա Աբդուլ Ռաշիդը (1929-1981), Կապուրի «Թափառաշրջիկը» ֆիլմում Ռիտայի դերակատարը:
Այս օրը ծնվածների շարքում, իհարկե, պետք է հիշատակել իտալացի մտածող ու պետական գործիչ Նիկոլո Մաքիավելիին (1469-1527), որի աշխատանքները, հատկապես՝ «Տիրակալը» գիրքը հետաքրքրություն են վայելում մինչ օրս:
Անդրադառնալով մայիսի 3-ին կատարված դեպքերին, չենք կարող ցավով չհիշել 2006 թվականի այս օրը տեղի ունեցած աղետը. «Արմավիա» ընկերության Երևան-Սոչի չվերթի Ա-320-211 օդանավի անկումը: Վայրէջքի գնացող օդանավը Սև ծովն ընկավ, ինչի հետևանքով զոհվեցին բոլոր ուղևորներն ու անձնակազմի անդամները՝ 113 մարդ:
Իհարկե, այսօրվա հետ կապված հիշարժան այլ իրադարձություններ էլ կան, բայց եթե ուզում եք հիշել, թե կոնկրետ անցած տարի ինչ դեպքեր են տեղի ունեցել Հայաստանում և աշխարհում, կարող եք սեղմել այս հղումը:
