ԵՐԵՎԱՆ, մայիսի 11 – Sputnik. Եթե Հայաստանի կառավարությունը գործնական քայլեր չձեռնարկի, ապա ալյուրի, հավի մսի և մի շարք այլ մթերքների գները կշարունակեն աճել։ Sputnik Արմենիայի թղթակցի հետ զրույցում այս մասին ասաց ՀՅԴ Բյուրոյի տնտեսական հետազոտությունների գրասենյակի աշխատակից, տնտեսագետ Սուրեն Պարսյանը։
Պաշտոնական տվյալների համաձայն` նախորդ տարվա ապրիլի համեմատ ալյուրի գինն աճել է 6,2%–ով, իսկ 5,3%–ով թանկացել է հացը։ Թանկացել է նաև այլ հացաբուլկեղենը։ Հավի մսի գինը բարձրացել է 13,4%–ով։
Փորձագետի խոսքով` հավի մսի թանկացումը պայմանավորված է 2019 թվականի հունվարի 1-ից մաքսատուրքի 4%–անոց աճով։ Ընդ որում, Պարսյանը համոզված է, որ հավի մսի թանկացումից կարելի էր խուսափել, եթե կարգավորվեր տեղական արտադրությունը և «ամերիկյան բդիկների» ներկրման անհրաժեշտություն չլիներ։
«Ինչ վերաբերում է ալյուրին, ապա այդ շուկայում մի քանի խոշոր խաղացող կա, որոնք կարող են պայմանավորվել և բարձրացնել գները։ Հետևաբար պետք է զարգացնել գյուղատնտեսական ոլորտը, կրճատել ցորենի ներկրման մասնաբաժինը և ավելացնել տեղական ալյուրի արտադրությունը», – ընդգծեց Պարսյանը։
Փորձագետի կարծիքով` հացաբուլկեղենի գների աճը պայմանավորված է նաև անցած տարվա ընթացքում գյուղատնտեսական ոլորտի անբարենպաստ արդյունքներով, երբ ցորենի պակասուրդ կար։
Պարսյանը նշեց, որ պետությունը պետք է լրջորեն զբաղվի այնպիսի ծրագրերի մշակմամբ, որոնք գյուղատնտեսական ոլորտը պակաս ռիսկային կդարձնեն և հնարավորություն կտան տեղական արտադրողին իրացնել սեփական արտադրանքը։
Այս համատեքստում տնտեսագետը էական սխալ է համարում գյուղնախարարության օպտիմալացումը։ Նրա կարծիքով` սա խնդիրների կհանգեցնի գյուղմթերքի կառավարման ոլորտում, իսկ կառավարությունը չի կարողանա վերահսկել ոլորտը։
ԱԺ–ն մայիսի 8-ին երկրորդ և վերջնական ընթերցմամբ կողմ քվեարկեց կառավարության կառուցվածքի փոփոխության նախագծին, ինչի արդյունքում նախարարությունների թիվը կրճատվեց` դառնալով 12։ Գյուղատնտեսության նախարարությունն ու տնտեսական զարգացման և ներդրումների նախարարությունը միավորվում են էկոնոմիկայի նախարարության կազմում։