ԵՐԵՎԱՆ, 21 մայիսի – Sputnik. Ամերիկա–չինական «սառը պատերազմը», ըստ ամենայնի, շարունակություն կունենա երեք ամսից, որովհետև ԱՄՆ-ի առևտրի նախարարությունը ժամանակավոր արտոնագիր է տվել Huawei-ին։
Նշենք, որ ԱՄՆ–ն նախ «սև ցուցակում» էր ընդգրկել Huawei ընկերությանն ու նրա 70 դուստր ընկերություններին` հայտարարելով, որ կանխում է ամերիկյան տեխնոլոգիաների այնպիսի օգտագործումը, որը կարող է վնասել ԱՄՆ–ի արտաքին քաղաքականությունը կամ ազգային անվտանգությունը (Huawei–ին արդեն մի քանի անգամ մեղադրել են չինական կառավարության օգտին լրտեսելու համար): Դրանից հետո Google–ն ու մի շարք ընկերություններ հայտարարել էին, որ այլևս չեն համագործակցելու չինական ընկերության հետ։
Եվ ահա այս հայտարարությունից ընդամենը մեկ օր անց ԱՄՆ-ի առևտրի նախարարությունը ժամանակավոր արտոնագիր է տվել Huawei–ին, որը թույլ կտա արտադրողին սպասարկել գոյություն ունեցող ցանցերը և թարմացումներ հատկացնել արդեն արտադրված սմարթֆոններին։ Միայն թե այս արտոնագիրը թույլ չի տալիս ամերիկյան ընկերություններին աշխատել Huawei-ի հետ։Այս մասին հայտնում է reuters–ը։
Արտոնագիրն արդեն ուժի մեջ է մտել և գործելու է մինչև 2019թ. օգոստոսի 19-ը: Սա ժամանակավորապես հետաձգում է առևտրային արգելքը, բայց թե ինչ տեղի կունենա 90–օրյա ժամկետը լրանալուց հետո, առայժմ հայտնի չէ: Երեք ամիս անց պարզ կդառնա` ԱՄՆ–ն ու Չինաստանը կկարողանա՞ն արդյոք ընդհանուր հայտարարի գալ, որ ընկերությունը կարողանա իր սմարթֆոններում կիրառել Google–ի ծառայությունները։
Հիշեցնենք` ավելի վաղ Google-ը հայտարարել էր, որ դադարեցնելու է համագործակցությունը Huawei-ի հետ: Ըստ այդմ՝ չինական սմարթֆոնները կզրկվեն Play Store հավելվածների խանութից և Google-ի ծառայություններից:
«Բարության կորպորացիան» ավելի ուշ նաև ավելացրել էր, որ Google Play ծառայությունները և Google Play Protect անվտանգության ֆունկցիան շարունակելու է գործել արդեն գոյություն ունեցող Huawei սմարթֆոններում:
For Huawei users' questions regarding our steps to comply w/ the recent US government actions: We assure you while we are complying with all US gov't requirements, services like Google Play & security from Google Play Protect will keep functioning on your existing Huawei device.
— Android (@Android) 20 мая 2019 г.
Այդուհանդերձ, Huawei-ի ներկայացուցիչները լավատեսությունը չեն կորցնում և վստահեցնում են, որ առանց ամերիկյան ընկերությունների հետ համագործակցության էլ իրենք «կապրեն»: Ընկերության տնօրեն Ռեն Ժենֆեյը հայտնել է, որ իրենք պատրաստվել էին իրադարձությունների նման հանգուցալուծմանը: Ընկերությունը հավաքել է դետալների պաշարներ, որը 3 ամիս կհերիքի: Բացի դրանից, նրանք հույս ունեն հետագայում օգտագործել իրենց սեփական պահեստամասերը: Ընկերությունը հայտարարել է, որ կկարողանա լուծել նաև օպերացիոն համակարգի խնդիրը: Նրանք վստահեցնում են, որ ունեն իրենց սեփական օպերացիոն համակարգը, որը կոչվում է Hongmeng և որի վրա աշխատում են 2012 թվականից:
